नेपाल उद्योग वाणिज्य महासंघले विभिन्न विधामा सबैभन्दा बढी आयकर दाखिला गर्ने आफ्ना सदस्यहरुलाई सम्मान गरेको छ । महासंघले आर्थिक वर्ष २०७९/०८० को आयकर विवरण अनुसार सबैभन्दा बढी आयकर तिर्ने आफ्ना सदस्यहरुलाई ५९औँ वार्षिक साधारणसभाको अवसरमा विधागत रुपमा सम्मान गरेको हो ।
जस अनुसार, वस्तु निर्यातको कारोबार गर्ने मध्येबाट डाबर नेपाल प्रा.लि., बैंक वित्तीय संस्था र बीमाको कारोबार गर्ने मध्येबाट नबिल बैंक र पर्यटन व्यवसाय गर्ने मध्येबाट तारागाउँ रिजेन्सी होटल लिमिटेड (होटल ह्यात) सम्मानित भएका छन् ।
यस्तै, वस्तु व्यापारको कारोबार गर्ने मध्येबाट भाटभटेनी सुपरमार्केट एण्ड डिपार्टमेन्टर स्टोर प्रा.लि., ऊर्जामूलक उद्योग मध्येबाट भोटेकोशी पावर कम्पनी, रेमिट्यान्स तथा मनी ट्रान्सफरको कारोबार गर्ने मध्येबाट सिटी एक्सप्रेस मनी ट्रान्सफर र विशेष उद्योग मध्येबाट वरुण विभरेज नेपाल प्रा.लि.लाई सम्मान गरिएको महासंघले जनाएको छ ।
