खाद्य प्रविधि तथा गुण नियन्त्रण विभागले माउण्टेन ड्यूको बिकी वितरणमा रोक लगाएको छ । विभागले काठमाडौँको पेप्सीकोलास्थित वरुण बेभरेज (नेपाल) प्रालिको ब्याच नं. १६८ को पेयपदार्थ बिक्रीवितरणमा रोक लगाएको छ ।
विभागको टोलीले सामाजिक सञ्जालबाट आएको गुनासोका आधारमा आकस्मिक अनुगमन गर्दै उक्त ब्याचको पेयपदार्थमा कैफियत देखिएको आशङ्कामा बिक्रीवितरणमा रोक लगाएको हो ।
काठमाडौँको तारकेश्वर नगरपालिका बस्ने एक उपभोक्ताले माउण्टेन ड्यु सेवन गर्दा बान्ता भएको भिडियो सामाजिक सञ्जालमा सार्वजनिक भएपछि विभागको उद्योगमा निरीक्षण गरेको थियो ।
विभागका अनुसार अनुगमनमा उपभोक्ताले सेवन गरेको ब्याच नं. १६८ (मितिः ०३–०४–२६) को २५० मिमी प्याकका उत्पादनमध्ये उद्योगको गोदाममा एक क्रेट मात्र फेला परेको र बाँकी उत्पादन डिलरमार्फत बजारमा पठाइसकिएको पाइएको छ ।
त्यसपछि विभागले उक्त ब्याचको उत्पादनमा प्रयोग भएको कच्चा पदार्थको विस्तृत विवरण र खाद्य स्वच्छतासम्बन्धी अभिलेख ५ दिनभित्र विभागमा पेश गर्न सम्बन्धित उद्योगलाई निर्देशन दिएको छ । साथै, सो ब्याचको नमुना सङ्कलन गरी प्रयोगशालामा परीक्षणका लागि पठाइएको छ । प्रयोगशालाको विश्लेषण प्रतिवेदन प्राप्त नभएसम्म उक्त ब्याचका पेयपदार्थ बिक्रीवितरण नगर्न उद्योग र सम्बन्धित डिलरलाई निर्देशन दिइएको हो ।
