अभिनेता तथा तमिलगा वेट्री कजगम (TVK) का अध्यक्ष सी. जोसेफ विजय (थालापथी विजय) आज तमिलनाडुको नयाँ मुख्यमन्त्रीमा नियुक्त भएका छन्। राज्यपाल राजेन्द्र विश्वनाथ आरलेकरले उनलाई पद तथा गोपनीयताको शपथ गराएका हुन्। चेन्नईको जवाहरलाल नेहरू स्टेडियममा भव्य समारोहका बीच यो शपथग्रहण भएको हो।
कुन-कुन दलको समर्थन ?
TVK ले आफैं १०८ सिट जितेको थियो। बहुमतका लागि आवश्यक समर्थन कांग्रेस, विदुथलै चिरुथैगल काची (VCK), CPI, CPI(M) र IUML बाट प्राप्त भएको छ। यी दलहरूको समर्थनसँगै विजयको पक्षमा १२० MLA को समर्थन रहेको छ।
तमिलनाडु विधानसभा २३४ सदस्यीय छ, बहुमतका लागि ११८ मत आवश्यक पर्छ। TVK ले १०८ सिट जिते पनि गठबन्धनको सहयोगमा १२० पुगेको हो।
TVK: १०८
कांग्रेस: ५
VCK: २
CPI/CPI(M): २+२
IUML: २
यो समर्थनसँगै विजयले राज्यपालसमक्ष सरकार गठनको दाबी पेश गरेका थिए।
मन्त्रिपरिषद्
विजयले आजै ९–११ सदस्यीय मन्त्रिपरिषद् गठन गरेका छन्। TVK का वरिष्ठ नेताहरूसँगै केही सहयोगी दलका प्रतिनिधि पनि मन्त्री बनेका छन्। अभिनेत्री तृषा लगायत अन्य विशेष अतिथिहरू समारोहमा उपस्थित थिए।
पहिलो निर्णय
मुख्यमन्त्री नियुक्त भएलगत्तै विजयले पहिलो निर्णयमा घरेलु उपभोक्तालाई प्रत्येक दुई महिनामा २०० युनिट विद्युत् नि:शुल्क दिने आदेशमा हस्ताक्षर गरे। यसबाहेक उनले महिलाविरुद्ध अपराध रोक्न “सिंगा पेन अधिराडी पडै” विशेष बल गठन गर्ने र प्रत्येक जिल्लामा एन्टी-नार्कोटिक्स स्क्वाड गठन गर्ने निर्णय पनि गरेका छन्।
५१ वर्षीय थालापथी विजय अभिनयबाट राजनीतिमा प्रवेश गरेका हुन्। उनको पार्टी TVK को यो पहिलो चुनाव नै थियो।
यो जितलाई तमिलनाडुमा १९६७ यता DMK-AIADMK बाहिरको पहिलो सरकारको रूपमा इतिहासमा राखिएको छ।
पूर्व मुख्यमन्त्री एम.के. स्टालिनले रचनात्मक विपक्षको भूमिका खेल्ने बताएका छन्।
विजयले “जननायक” को छवि बनाउँदै युवा, महिला सुरक्षा, भ्रष्टाचार नियन्त्रण र विकासलाई प्राथमिकता दिने बताएका छन्।
