नेपाल उद्योग वाणिज्य महासंघ बागमती प्रदेशको अध्यक्षमा हालका उपाध्यक्ष दुर्गाराज श्रेष्ठले अध्यक्षमा उम्मेदवारी घोषणा गरेका छन् । नेपाल वितरक संघको पूर्व अध्यक्षसमेत रहेका श्रेष्ठ हाल नेपाल उद्योग वाणिज्य संघ काठमाडौँको महासचिवसमेत हुन् ।
व्यसायिक सफलता र विभिन्न संघहरुमा सफल नेतृत्व गरिसकेका उनी नेपाल–माल्टा चेम्बर अफ कमर्स एण्ड इन्डष्ट्रीको कार्यकारी सदस्य पनि छन् । श्रेष्ठले पोखरा विश्वविद्यालयबाट एमबीए सम्मको अध्ययन गरेका छन् । २०६२ सालदेखि व्यवसायमा संलग्न भएका उनीसँग हामीले चुनावी तयारी, एजेन्डा र बागमती प्रदेश भित्रका सम्भावनाका विषयमा कुराकानी गरेका छौँ ।
उद्योग वाणिज्य महासंघ बागमती प्रदेशको अध्यक्षमा तपाईको उम्मेदवारी किन ?
म नेपाल उद्योग वाणिज्य महासंघ बागमती प्रदेशमा दुइ कार्यकाल उपाध्यक्ष भएर उद्योगी व्यवसायीका हित संरक्षण र निजी क्षेत्रका माग र मुद्दाहरुमा केन्द्रित रहेर काम गर्दै आएँ । यस अवधिमा उद्योगी र व्यवसायी साथीहरुसँग सहकार्य गर्दै उत्पादक र वितरकबीच समन्वय स्थापित गर्न महत्वपूर्ण भूमिका निर्वाह गर्न सफल पनि भएँ ।
उद्योग वाणिज्य महासंघ भनेको नेपाल सरकारपछि सबैभन्दा ठूलो नेटवर्क भएको सशक्त संगठन हो । प्रदेश महासंघ भनेको महासंघको एउटा दह्रो र भरपर्दो अङ्ग मात्रै होइन, साना मझौला र सबै खालका उद्योगी व्यवसायीहरुको आशा र भरोसाको केन्द्र बन्नुपर्ने आवश्यकता छ । यसकारण मैले बागमती प्रदेश महासंघलाई थप सशक्त बनाउने उदेश्यका साथ अध्यक्षमा उम्मेदवारी दिने निर्णय गरेको हुँ ।
उद्योगी व्यवसायीहरुका अपेक्षा पूरा गर्ने तपाईका एजेन्डा के छन् ?
प्रदेश महासंघ पनि छ है भनेर देखाउने र यस संगठनले उद्योगी व्यवसायीहरुका मुद्दा र विचार बोक्छ र प्रदेश सरकार र आवश्यक परेमा केन्द्र सरकारसँग समेत स्ट्रङ लविङ गर्न सक्छ भनेर प्रमाणित गर्ने मेरो मुख्य योजना छ ।
यसका साथै, मैले बागमती प्रदेशका जिल्ला नगर उद्योग वाणिज्य संघहरु र यहाँका वस्तुगत संघहरु र एसोसियट सदस्यहरुको समस्या राम्रोसँग बुझेको छु । प्रदेश उद्योग वाणिज्य महासंघ, वस्तुगत संघहरु र जिल्ला नगर उद्योग वाणिज्य संघहरुको आर्थिक तथा व्यवसायिक क्षमता विकासमा सरकार र स्थानीय तहसँग समन्वय गर्नुपर्नेछ । जिल्ला नगर उद्योग वाणिज्य संघका लागि आम्दानीको प्रमुख स्रोतका रुपमा रहेका मेला महोत्सव जस्ता क्रियाकलापलाई स्थानीय तहहरुको तालिकामा नै समावेश गर्ने खालको मोडल बनाएर काम गर्ने सोच बनाएका छौँ ।
साना र मझौला व्यवसायीहरुले नापतौल र बजार अनुगमनका नाममा हैरानी खेप्नुपरिरहेको छ । यो समस्याको समाधानका लागि स्थानीय प्रशासनसँग दीर्घकालिन समझदारी बनाएर काम गर्नुपर्नेछ ।
साना मझौला उद्यम व्यवसायहरुलाई कर सहुलियत र व्यवसाय दर्तामा एकद्वार प्रणाली कायम गर्नुपर्ने आवश्यकता छ । शहर बजारमा उद्यम व्यवसाय डिजिटल फ्रेमवर्कभित्र गइसकेपनि दूरदराजमा अझैपनि डिजिटल सेवा प्रभावकारी रुपमा पुगिसकेको छैन । यसका लागि सम्बन्धित स्थानीय तहमार्फत उद्योग वाणिज्य संघहरुसँगको सहकार्यमा उद्यम व्यवसाय डिजिटल फ्रेमवर्कभित्र ल्याउने गरी काम गर्न नीतिगत रुपमै व्यवस्था गराउन पहल गर्नुपर्नेछ ।
एसएमईहरुलाई सहुलियतपूर्ण कर्जा र कर सहुलियत दिलाउने, साना र मझौला व्यवसायलाई कर र लेखा प्रणाली जस्ता विषयमा तालिम र प्रशिक्षण प्रदान गर्ने जस्ता विषयमा पनि हामीले काम गर्न चाहेका छौँ ।
यस्तै, प्रदेश महासंघको अहिले आफ्नै भवन छैन । मैले मेरै कार्यकालमा सुविधासम्पन्न भवन बनाउने अठोट लिएको छु । यसका लागि सबै जिल्ला नगर, वस्तुगत र एसोसियटका उद्यमी व्यवसायी साथीहरुको अमूल्य सहयोग प्राप्त हुने विश्वास पनि लिएको छु ।
निजी क्षेत्र भनेको सम्भावना देख्ने जात पनि भनिन्छ । तपाईले बागमती प्रदेशभित्र के कस्ता सम्भावना देख्नुभएको छ ? र, ति सम्भावनालाई मूर्त रुप दिन के कस्ता कार्यक्रम अघि सार्ने सोच्नुभएको छ ?
मैले अघि पनि भने, बागमती प्रदेशभित्रका सबै भूगोल र वस्तुगत एसोसियट सदस्यहरुको समस्या र सम्भावनाबारे म जानकार छु । मुलुकको राजधानी रहेको काठमाडौँ उपत्यका पनि बागमती प्रदेशभित्र पर्ने भएकाले देशको कुल आर्थिक कारोबारको ठूलो हिस्सा बागमतीले ओगट्छ । यो प्रदेशभित्र उच्च पहाडी भेगको जटिबुटी, कृषि र पर्यटनसम्म र समथर भू–भागमा हुने उत्पादनदेखि सेवा क्षेत्रसम्म अपार सम्भावना छन् । यीनको व्यवस्थित उपयोग गर्ने गरी आर्थिक तथा औद्योगिक नीति बनाउनका लागि हामीले प्रदेश सरकारलाई अनुरोध गर्ने र सहयोग गर्ने योजना बनाएका छौँ ।
साथै, बागमती प्रदेशभित्र घोषणा भएका औद्योगिक क्षेत्रहरुभित्र सहजै उद्योग खोल्न सक्ने वातावरण नहुँदा अहिले घोषणा भएका औद्योगिक क्षेत्रभित्र उद्योगहरु आउन सकिरहेका छैनन् । प्रस्तावित औद्योगिक क्षेत्रभित्र उद्योग खोल्दा कर तथा अन्य सेवासुविधामा सहुलियत दिलाउने प्रयत्न गर्नेछौँ ।
मयुरधाप औद्योगिक क्षेत्रभित्र सहजै उद्योगहरु स्थापना हुन सक्ने खालको वातावरण बनाउनुपर्नेछ । शक्तिखोर औद्योगिक क्षेत्र पनि पहिचान भएको छ, पूर्वाधार तयार नहुँदा उद्योगहरुले सम्भावना पहिल्याउन सकेका छैनन् । यी यावत विषयमा प्रदेश सरकारसँग गहन छलफल गरी नतिजा निकाल्ने काम नै मेरो प्रमुख प्राथमिकतामा छन् ।
प्रदेश महासंघ र प्रदेश भित्रका उद्योग वाणिज्य संघहरुलाई आत्मनिर्भर बनाउने तपाईका एजेन्डा के छन् ?
मैले माथि पनि भने, अहिले प्रदेश महासंघको आम्दानीको आफ्नै स्रोत निकै सिमित छ । जिल्ला नगर उद्योग वाणिज्य संघहरुले मेला महोत्सव आयोजना गरेपनि निजी क्षेत्रको मात्रै प्रायोजन र सहयोगमा गर्नुपर्दा कतिपय अवस्थामा घाटासमेत ब्यहोर्नु परिरहेको स्थिति पनि छ । वस्तुगत संघहरुको पनि खर्च बढी छ, आम्दानीमा सदस्यता शुल्क बाहेकको भरपर्दो विकल्प छैन ।
यसकारण प्रदेश महासंघको आफ्नै भवन हुनासाथ त्यसबाट आम्दानी हुन सक्छ । कतिपय अवस्थामा प्रदेश सरकारसँग सहकार्य गरेर विभिन्न कार्यक्रम आयोजना गर्न सकिन्छ । त्यो विकल्पमा पनि अब जानुपर्नेछ ।
मेला र महोत्सवलाई सम्बन्धित स्थानीय तहहरु र उद्योग वाणिज्य संघहरुको वार्षिक कार्यक्रम नै बनाउन सकियो भने त्यसबाट जिल्ला नगर उद्योग वाणिज्य संघहरुको आम्दानी स्थायी हुन सक्छ । मेला, महोत्सव र प्रदर्शनी भनेको उद्योग वाणिज्य संघ र वस्तुगत संघहरुको अधिकार हो भन्ने गरी स्थापित गराउने हामीले योजना बनाएका छौँ ।
यसका साथै, उद्यम व्यवसायहरुको दर्ता र नवीकरणमा समेत सम्बन्धित उद्योग वाणिज्य संघहरु निश्चित प्रतिशत हिस्सेदार बन्ने बाटो खोल्न नीतिगत प्रावधान नै लागू गर्न सकियो भने त्यो पनि अर्को विकल्प बन्छ । यसमा सम्बन्धित निकायहरुसँग समन्वय गरेर छलफल अघि बढाउँछौँ ।
वस्तुगत संघहरुको आम्दानी बढाउनका लागि उनीहरुमार्फत सम्बन्धित क्षेत्रको प्रदर्शनीहरु आयोजना गर्न सकिन्छ । यसले व्यवसाय प्रवद्र्धनसँगै वस्तुगत संघहरुको आम्दानीसमेत बढाउन मद्दत पुग्छ । यसरी आयमूलक र आत्मनिर्भर बन्ने विभिन्न उपायहरु पहिल्याउँदै हामी अघि बढ्नेछौँ ।
अन्तिममा, मतदाता उद्योगी व्यवसायीहरुलाई के भन्न चाहनुहुन्छ ?
मैले उद्योग व्यवसायमैत्री नीति निर्माणमा आफूलाई केन्द्रित गर्ने लक्ष्यका साथ बागमती प्रदेश महासंघको अध्यक्षमा उम्मेदवारी दिने निर्णय गरेको हुँ । उद्योगी व्यवसायीका मुद्दाहरुलाई सरकारसमक्ष सशक्त रुपमा उठाउने मेरो प्रतिवद्धता छ । मैले बागमती प्रदेश महासंघलाई पर्याप्त समय दिन सक्छु, जिल्ला नगर, वस्तुगत र एसोसियट सदस्यहरुले मलाई खोज्नुपर्दैन, म आफैँ उहाँहरुलाई खोजेर पुग्नेछु ।
यसकारण बागमती प्रदेशका सम्पूर्ण उद्योगी व्यवसायी साथीहरुमा समृद्ध र सुदृढ व्यवसायिक वातावरण निर्माण गर्ने उदेश्यसहित उद्योग वाणिज्य महासंघ बागमती प्रदेशको अध्यक्षमा मेरो उम्मेदवारी रहेको कुरा अवगत गराउँदै यहाँहरुको अमूल्य मत प्राप्त हुने विश्वाससमेत व्यक्त गर्दछु ।
