अटोमोबाइल्स व्यवसायीहरुको छाता संस्था नाडा अटोमोबाइल्स एसोसियशन अफ नेपालको अध्यक्षमा सुरेन्द्र कुमार उप्रेती (सुरेश) चयन भएका छन् । ५ दशक लामो विरासत बोकेको यस संस्थाको महासचिव हुँदै अध्यक्ष बनेका उप्रेतीसँग व्यवसायीका अपेक्षा पनि कम छैनन् ।
खासगरी, जेन् जी आन्दोलन पश्चात शिथिल बनेको अटोमोबाइल्स उद्योगको पुनरोत्थान, स्थिर कर नीति र व्यवसायिक वातावरण निर्माणमा नयाँ नेतृत्वले स्पष्ट पहल गर्नुपर्ने अहिलेको आवश्यकता छ । साथै, नाडाभित्र केही समययता देखिएको तिक्तता मेटाउँदै सबै पक्षलाई समेट्नुपर्ने चुनौती पनि उनका सामू छन् । यीनै विषयमा केन्द्रित रहेर हामीले नाडाका नवनिर्वाचित अध्यक्ष उप्रेतीसँग कुराकानी गरेका छौँ ।
प्रस्तुत छ कुराकानीको सम्पादित अंशः
दशकौँ लामो विरासत बोकेको नाडा जस्तो संस्थाको अध्यक्ष बन्नु भएको छ । मुद्दा मामिलाका विषयले केही सदस्यहरु चिढिनु भएको पनि होला । कसरी समेटेर अघि बढ्नु हुन्छ ?
सबैभन्दा पहिला त व्यक्ति भन्दा पनि संस्था मुख्य कुरा हो । व्यक्तिले स्वभाविक रुपमा संस्थाका लागि योगदान दिने विषय त छँदैछ । व्यक्ति व्यक्तिले मिलेर योगदान दिएपछि नै संस्थाको विकास हुने हो । यसकारण नाडाको हितका लागि अटोमोबाइल्स व्यवसायमा रहनु भएका साथीहरु र तपाईहरु जस्तो पत्रकारहरुको पनि योगदान रहँदै आएको छ, भविष्यमा पनि सबैको सहयोग रहन्छ भन्ने मैले विश्वास लिएको छु ।
अटोमोबाइल्स क्षेत्र भनेको देशको विकास र समृद्धिको ऐना पनि हो । अटोमोबाइल्स क्षेत्रको विकास भनेको देशको विकाससँग जोडिएको हुन्छ । यसर्थ, हामीले अटोमोबाइल्स क्षेत्रको उत्थान र नाडाको संस्थागत विकासका लागि एक भएर लाग्नुपर्छ । हिजोका तीता–मिठा कुराहरु सम्झेर भन्दा पनि भविष्यलाई हेरेर हामीले काम गर्नुपर्ने हुन्छ ।
संस्था ठूलो हुँदै गएपछि हरेक व्यक्तिका फरक फरक चाहना देखिनु स्वभाविक पनि हो । संस्था भनेको सामूहिक योगदानले चल्ने हो, म एक जना व्यक्तिले मात्रै थेग्छु भनेर हुँदैन । नाडा देशभरीका अटोमोबाइल्स व्यवसायीहरुको संस्था हो, सबैको भावना समेटर अघि बढ्नुपर्ने अहिलेको आवश्यकता छ । विगतको तिक्तता बिर्सेर सबैलाई एकमतका साथ अघि बढ्न म आह्वान पनि गर्छु । म आफैँले पनि बाहिर रहनु भएका साथीहरुसँग कुराकानी गरिरहेको छु, चित्त नबुझेका साथीहरुलाई चित्त बुझाएर ल्याउने कुरामा म दत्तचित्त भएर लाग्नेछु । मैले यसलाई आफ्नो पहिलो दायित्व नै ठानेको छु ।
नाडालाई ठूला आयाकर्ताले विश्वास गर्न छोडे भन्ने खालको चर्चा पनि हुन थालेको छ । बजारले ठूला आयातकर्ता भनेर चिन्ने व्यवसायीहरुलाई साथमा लिने र उनीहरुको विश्वास जित्ने कुरामा कत्तिको चुनौति महशुस गर्नुभएको छ ?
नाडा भनेको कम्पोनेन्टदेखि बाइक, कार, कमर्शियल भेहिकल, हेभि इक्वीपमेन्ट सबै खाले व्यवसाय गर्ने व्यक्तिहरुको छाता संस्था हो । आयात गर्ने र नेपालमै एसेम्बल गर्ने सबैको संस्था हो यो । २८ सयभन्दा बढी व्यवसायीहरु त प्रत्यक्ष रुपमा नाडामा जोडिनु नै भएको छ । उहाँहरु सबै नाडाका लागि बराबर हुनुहुन्छ । यसकारण तपाईले व्यवसायमा, संस्थामा, राज्यमा कति योगदान दिनुभएको छ भन्ने कुरा तपाईले पाउने कदरपत्रले देखाउने कुरा हो । अन्यथा, सबै सदस्य संस्थाका लागि बराबर हुन्छन् ।
जहाँसम्म, ठूला व्यवसायी वा आयतकर्ता भन्ने विषय छ, उहाँहरुको योगदान अवश्य पनि छ । उहाँहरु भएरै संस्थाले आज यो उचाई प्राप्त गरेको हो । उहाँहरुको योगदानकै कारण आज राज्यको राजस्वमा अटोमोबाइल्स क्षेत्रको योगदान २२ प्रतिशतभन्दा माथि छ । एक लाखभन्दा बढी व्यक्तिहरुले अटोमोबाइल्स क्षेत्रमा प्रत्यक्ष रोजगारी पाउनु भएको छ, अप्रत्यक्षसम्म जोड्ने हो भने १० लाखभन्दा बढी मानिसहरु यो क्षेत्रमा जोडिएका छन् ।
यसकारण उहाँहरुको योगदान निकै ठूलो छ । हामीले पूर्वज र अग्रजहरुको योगदान भुल्नु हुँदैन । हामीले पूर्व अध्यक्ष ज्यूहरु, पूर्व पदाधिकारी ज्यूहरु सबैबाट आवश्यक सुझाव लिएरै आगामी दिनमा संस्थालाई अघि बढाउने हो, यसमा सबैको मार्गनिर्देशन प्राप्त हुने कुरामा हामी विश्वस्त छौँ ।
अटोमोबाइल्स क्षेत्रलाई रोजगारीको मुख्य क्षेत्रका रुपमा तपाईहरुले परिभाषित गर्दै आउनु भएको छ । प्राविधिक शिक्षाको कोर्स निर्माणमै पनि तपाईहरुको सहभागीता हुन थालेको छ । आगामी दिनमा यो अभियान कसरी अघि बढ्छ ?
अहिले नेपालमा गाडी र बाइकका एसेम्बल प्लान्टहरु सुरु भइरहेका छन् । क्रमशः पार्टस्हरुको पनि उत्पादन सुरु हुन थालेको छ । यो भनेको हाम्रो जनशक्तिलाई स्वदेशमै रोक्ने महत्वपूर्ण आधार हो । अटोमोबाइल्स क्षेत्रमा सामान्य श्रमिकदेखि उच्च योग्यता भएको इन्जिनियरसम्म जोडिएका हुन्छन् ।
यसकारण युवा शक्तिलाई स्वदेशमै राम्रो रोजगारी दिन सक्ने भरपर्दो विकल्प भनेकै अटोमोबाइल्स क्षेत्र हो भनेर हामीले भन्दै आएका छौँ । अहिले क्रमशः यो कुरा देखिँदै पनि छ । हामीले सीपयुक्त र प्राविधिक जनशक्ति उत्पादनका लागि सीटीईभीटी जस्ता संस्थासँग मिलेर काम गर्न सुरु नै गरिसकेका छौँ । आगामी दिनमा पनि यो निरन्तर रहन्छ ।
नयाँ सरकार बन्दैछ, एकल बहुमतको सरकार बन्ने भएकाले निजी क्षेत्र उत्साहित पनि देखिन्छ । नयाँ सरकारसँग अटोमोबाइल्स क्षेत्रका अपेक्षा चाहिँ के छन् ?
हामीले राष्ट्रिय स्वतन्त्र पार्टीको घोषणापत्र हेरेका छौँ, उहाँहरुले उल्लेख गर्नु भएका अर्थतन्त्रसँग सम्बन्धित योजनाहरु हेरेका छौँ । यसकारण हामीले सरकारबाट अपेक्षा मात्रै गर्ने भन्दा पनि अटोमोबाइल्स क्षेत्रले उहाँहरुले भनेजस्तो काम गर्नका लागि कस्तो सहयोग गर्न सक्छ त ? यो कुरा हामीले हेर्नुपर्छ । रास्वपाले रोजगारीलाई मुख्य एजेन्डा बनाएको छ, अब त्यो रोजगारीमा अटोमोबाइल्स क्षेत्रले कति सहयोग गर्न सक्छ ? हामीले यो हेर्नुपर्छ । हामी अटोमोबाइल्स क्षेत्रबाट यति रोजगारी थप गर्न सक्छौँ, यसका लागि नीतिगत रुपमा यो यो कुरामा सहजता आवश्यक हुन्छ भनेर हामी नयाँ सरकारसँग छलफल गर्छौँ । हरेक पटक सरकारसँग माग्ने मात्रै होइन, सरकारलाई पनि सहयोग गर्ने हो, योगदान पनि गर्ने हो ।
अहिले एसेम्बल प्लान्ट लागिरहेका छन्, यो दीगो हुनासाथ उद्योग नै लाग्छन् । अरु कम्पोनेन्टका उद्योगहरु पनि सुरु हुन्छन् । यसले रोजगारी बढाउँछ, आम्दानी बढाउँछ, व्यक्तिको आम्दानी बढ्नु भनेको राज्यको आम्दानी पनि बढ्नु हो ।
अर्को कुरा, भौतिक निर्माणको कुरा पनि छ । विकास र समृद्धि हामी नेपालीहरुको मुख्य चाहना हो । निर्माणको कामका लागि पनि यातायात अपरीहार्य छ । आधुनिक प्रविधियुक्त मेशिन औजारहरु ल्याउने, कृषिमा आधुनिक औजार उपकरणहरु ल्याउने जस्ता कुराहरु हामीसँग जोडिएको हुन्छ । यसकारण सरकार र अटोमोबाइल्स व्यवसायी भनेको एक अर्काका परिपूरक हुन् । रास्वपाले १०० खर्बको अर्थतन्त्र बनाउने भनेको छ, त्यसमा सबैभन्दा ठूलो भूमीका अटोमोबाइल्स क्षेत्रकै हुन्छ । यसमा हामी नयाँ सरकारसँग सहकार्य गर्न आतुर छौँ ।
अहिले आगामी आर्थिक वर्षको बजेटको तयारी पनि अघि बढेको छ । अटोमोबाइल्ससहित निजी क्षेत्रले स्थिर कर नीतिको वकालत गर्दै आएपनि हरेक वर्ष बजेटको तयारी चलिरहेका बेला गाडीको कर बढ्छ भन्ने हल्ला हुन्छ । अब आउँदो बजेटमा पनि अटोमोबाइल्स क्षेत्रले कस्तो नीतिको अपेक्षा गरेको छ ?
हरेक वर्ष बजेट आउने बेलामा गाडीको कर बढ्छ कि, बाइकको कर बढ्ला कि, नयाँ कर थपिएला कि भन्ने चिन्ता हुन्छ । यो भनेको अस्थिर कर नीतले निम्त्याएको चिन्ता हो । व्यवसायीदेखि खरिदकर्ता सम्मलाई हरेक वर्ष यो विषयले चिन्तित बनाउँछ ।
अर्को कुरा, अहिले हामीले सबै खालका सवारी साधनलाई हुने खालको स्थिर नीति चाहिन्छ भन्दै आएका छौँ । ईभीलाई प्रोत्साहन दिनुपर्छ, एसेम्बललाई पनि प्रोत्साहन दिनुपर्छ । नेपालको अर्थतन्त्र, राजस्व र रोजगारीमा आईस इन्जिनका गाडीको ठूलो योगदान छ, यसलाई पनि हेरिनुपर्छ । समग्रमा भन्नुपर्दा नयाँ सरकार बनिसकेपछि हामी उहाँहरुसँग बस्छौँ, छलफल गर्छौँ । बजेट निर्माणका सन्दर्भमा पनि हाम्रो तर्फबाट सुझावहरु प्रस्तुत गर्छौँ ।
साथै, भदौ २३ र २४ गतेको जेन् जी आन्दोलनले अटोमोबाइल्स क्षेत्रसहित समग्र निजी क्षेत्रकै मनोबल खस्केको छ । बैंकमा लगानीयोग्य रकम थुप्रिएको छ, तर कर्जाको माग कमजोर छ । जबसम्म उद्यम, व्यवसायलाई प्रोत्साहन गरिँदैन, तबसम्म रोजगारी पनि बढ्दैन र देश समृद्ध पनि बन्दैन । रास्वपाबाट यसपाली अर्थशास्त्री र उद्योगी व्यवसायीहरु पनि नीति निर्माण गर्ने थलोमा पुग्नु भएको छ, उहाँहरुले यो कुरा बुझ्नु भएकै छ । यसर्थ, स्थिर र अनुमानयोग्य कर नीति, लगानीमैत्री वातावरण र आर्थिक सुशासनलाई प्राथमिकतामा राखेर नयाँ सरकारले काम गर्नेछ भन्नेमा हामी आशावादी छौँ ।
