गरिमा क्यापिटलले निष्काशन गरेको खुलामुखी सामुहिक लगानी कोष योजना (ओपन म्युचुअल फण्ड) को इकाईमा आवेदन दिने म्याद थप भएको छ । म्याद थप भएसंगै यस निष्काशनमा चैत्र १२ गतेसम्म आवेदन दिन सकिने छ । यद्यपि सो भन्दा अगाडी नै पर्याप्त आवेदन परेमा सार्वजनिक सुचना जारी गरेर बिक्री बन्द गरिने क्यापिटलले जनाएको छ ।
क्यापिटलले फागुन २८ गतेदेखि खुलामुखी सामुहिक लगानी कोष योजना (ओपन म्युचुअल फण्ड) को इकाई बिक्री खुला गरेको हो। क्यापिटलले गरिमा म्युचुअल फण्ड अन्तर्गत संचालन हुने गरिमा सुवर्ण योजना नामको ओपन म्युचुअल फण्डको इकाई निष्काशन गरेको हो ।
नेपाल धितोपत्र बोर्डले माघ २१ गते क्यापिटललाई योजना संचालनको अनुमति दिएको थियो । यस योजनाको आकार १ अर्ब रहेको छ। फण्ड अन्तर्गत प्रति इकाई १० रुपैयाँको दरले १० करोड इकाई निष्काशन भएको छ।
क्यापिटलले पहिलो चरणमा ५ करोड इकाई मात्र निष्काशन गर्न लागेको हो । जस मध्ये बिज पुंजी वापत ६० लाख इकाई योजना व्यवस्थापक गरिमा क्यापिटललाई, र ९० लाख इकाई कोष प्रबर्दक गरिमा विकास बैंकलाई छुट्याईएको छ। बाँकि रहेको ३ करोड ५० लाख इकाई सर्वसाधारणलाई निष्काशन हुने छ। यस निष्काशनमा आवेदन दिंदा न्युनतम १०० इकाई र अधिकतम ५० लाख इकाईसम्म आवेदन दिन सकिने छ।
नेपाली नागरिक, गैरआवासीय नेपाली, प्रचलित कानून बमोजिम दर्ता भएका नेपाली फर्म, संघ–संस्था, बैंक, वित्तीय संस्था, बीमा कम्पनी, कुनै पनि वर्ग वा समूहले खडा गरेको कोषहरु जस्तै संचयकोष, कल्याणकारी कोष, गुठि, अक्षयकोष आदिले इकाई खरिद गर्न आवेदन दिन सक्नेछन्।
यो पनि : बिहीबारबाट निष्काशन हुँदै गरिमा सुवर्ण योजना, यस्ता छन् विशेषता
