काठमाडौँ जिल्ला उद्योग वाणिज्य संघले डिजिटल एक्स्पो आयोजना गर्न लागेको छ । अनलाइन स्टलमै सबै खालका उद्यम व्यवसायलाई सहभागी गराएर डिजिटल एक्स्पो आयोजना गर्न लागिएको काठमाडौँ जिल्ला उद्योग वाणिज्य संघले जनाएको छ ।
संघका महासचिव दुर्गाराज श्रेष्ठका अनुसार अनलाइनबाटै उद्यम व्यवसायका लागि स्टल उपलब्ध गराइने छ । स्टलको शुल्क १० हजारदेखि ५ लाखसम्म तोकिएको छ । १ महिनासम्म चल्ने एक्स्पोमा सबै खालका उद्यम व्यवसायले सहभागीता जनाउन सक्ने उनको भनाइ छ ।
अनलाइन ब्यापारको अभ्यासमा अभ्यस्त गराउन र बजारीकरणमा मद्दत पुर्याउन अनलाइनमार्फत डिजिटल एक्स्पो आयोजना गर्न लागिएको महासचिव श्रेष्ठले जानकारी दिएका छन् ।
अध्यक्ष दिनेश श्रेष्ठले पनि अहिले क्रमशः उपभोक्ताहरु भौतिक रुपमा भन्दा अनलाइनबाटै वस्तु तथा सेवा खरिद गर्न अभ्यस्त हुँदै गएकाले व्यवसायीहरुलाई त्यसका लागि अभ्यस्त बनाउने उदेश्यले डिजिटल एक्स्पो आयोजना गर्न लागिएको जानकारी दिएका छन् । उनका अनुसार यसका लागि वेभसाइड तयार भइसकेको छ ।
जेष्ठ अन्तिम हप्ताबाट एक्स्पो सुरु हुने बताइएको छ । अहिले स्टल बुकिङ लगायतका काम भइरहेका छन् ।
