बुधबार भाटभटेनी सुपरमार्केटको कोटेश्वरस्थित स्टोरमा कर्मचारीहरूलाई सम्मान गर्ने कार्यक्रम थियो । चैत १५ गते राजावादी समूहको तोडफोड र लुटपाटबाट स्टोर बचाउन भूमीका खेलेका कर्मचारी र सुरक्षा गार्डलाई सम्मान गर्न भाटभटेनीले कार्यक्रम आयोजना गरेको थियो ।
सुरुवातमा भाटभटेनीका प्रमुख कार्यकारी अधिकृत पानु पौडेलले विषयवस्तु राखे । उनले भूकम्प, नाकाबन्दी र कोराना कालमा भाटभटेनी ‘सप्लाइ चेन’मा निर्वाह गरेको फेहरिस्त सुनाए । अनि चैत १५ गतेको घटनाबाट सिर्जित त्रास र डरकै बीचमा पनि जिम्मेवारी निर्वाहमा भाटभटेनी परिवार दत्तचित्त भएर लागिरहेको बताए ।
त्यसपछि सुरक्षा गार्ड लगायतलाई सम्मान गरियो र, मन्तव्यका लागि भाटभटेनीका अध्यक्ष मीनबहादुर गुरुङलाई मञ्चमा बोलाइयो । निकै सरल देखिने मीनबहादुर मन्तव्यका क्रममा कतै भावुक, कतै रमाइलो र कतै आक्रामक सुनिए ।
राजसंस्था वा राजतन्त्र फर्काउने आन्दोलनको जनकमान्डर बनाइएका दुर्गा प्रसाईं ‘गुण्डा नाइके’ भएको मीनबहादुरको आरोप छ । विगतमा मारवाडी समुदाय लक्षित घृणित टिपप्णी गर्दा र बैंकको ऋण तिर्नुपर्दैन भन्दै आम मान्छेलाई उकास्दा राज्यले कुनै कारबाही नगर्दा प्रसाईं थप उत्तेजित बनेको गुरुङको भनाइ छ । राज्यले पुलपुल्याउँदा प्रसाईंले अहिले वितण्डा मच्चाइरहेको उनको दाबी छ ।
‘त्यहीँ मान्छे मारवाडीले यस्तो गर्यो, त्यस्तो गर्यो भन्दै हिँड्छ । मारवाडी देशको नागरिक होइन ? मारवाडी भगाउन हुन्छ ? देश कंगाल बनाउने ?’ गुरुङले प्रश्न गर्दै भने, ‘दुर्गा प्रसाईं गुण्डा नाइके हो । यसो भन्दा मलाई कुनै डर र त्रासको चिन्ता छैन, कुनै हिनताबोध पनि छैन । यदि हामीले उसको बी एण्ड सी अस्पतालमा गएर तोडफोड गर्यौँ भने के हुन्छ ?’
गुरुङले दुर्गा प्रसाईं जस्ता अराजक र गुण नाइकेहरुले नेतृत्व गरेको आन्दोलन सफल नहुने पनि ठोकुवा गरे । ‘दुर्गा प्रसाईंको आन्दोलनले राजसंस्था फर्किँदैन, म ठोकुवा दिएर भन्छु । भाटभटेनीलाई लुटपाट गरेर राजसंस्था फर्किन्छ ? भाटभटेनीमा ढुंगा हानेर नेपालको संविधान संविधान मेटिन्छ ? हामी बुझ्दैनौँ ? यो सबै डकैत हो’ उनले भने, ‘कसैलाई राजतन्त्रको ह्याङ ओभर होला, नवराज सुवेदीलाई त झन हुने नै भयो । मेरा माइला बा पनि २००७ सालपछि पटक पटक राण शासन फर्किन्छ कि क्या हो भन्थे । तर, त्यो हुने कुरै थिएन । अहिले राजतन्त्रको कुरा पनि त्यस्तै हो ।’
