राजावादी समूहले चैत १५ गते गरेको अराजक र हिंसात्मक प्रदर्शनका क्रममा निजी तथा सार्वजनिक सम्पत्तिमाथि आक्रमण, लुटपाट र आगजनी भएको घटनाप्रति नेपाल उद्योग वाणिज्य महासंघले ध्यानाकर्षण भएको जनाएको छ ।
शनिबार एक विज्ञप्ति प्रकाशित गर्दै महासंघले चैत १५ गते राजावादी समूहले गरेको आन्दोलन तथा प्रर्दशनबाट सर्वसाधारण एवं उद्यमी व्यवसायीको पेशा व्यवसाय गर्न पाउने नैसर्गिक अधिकार हनन् भएको बताउँदै आन्दोलनका क्रममा मानवीय क्षतिसँगै धनजनमा भएको आक्रमण निक्कै दुःखद रहेको जनाएको हो ।
‘सर्वसाधारणको निजी जायजेथा, मिडिया हाउस, व्यवसायिक प्रतिष्ठानहरूको सम्पत्ति, कार्यालय र अन्य व्यापारिक गतिविधिहरूमा आक्रमण, आगजनी, लुटपाट लगायतका हिंस्रक घटनाबाट ठूलो क्षति पुगेकोमा यसको भत्र्सना गर्दै क्षतिपूर्ति हुनुपर्ने महासंघको माग छ’ महासंघले भनेको छ ।
संविधान प्रदत्त अधिकार भित्र रहेर आफ्ना माग राख्न पाइए पनि हिंस्रक आन्दोलन एवं प्रदर्शनका साथै लुटपाट, आगजनी, धनजनको क्षति र व्यक्तिगत सम्पत्ति माथिको आक्रमण निन्दनीय रहेको भन्दै महासंघले कुनै पनि स्वरुपमा हुने यस प्रकारका घटना प्रति घोर निन्दा र भत्र्सना गरेको छ ।
महासंघले सार्वजनिक सुरक्षा सुनिश्चित गर्न र यस्ता घटनाहरूको पुनरावृत्ति रोक्न सम्बन्धित सबैमा आग्रह पनि गरेको छ ।
