नेपाल एसबीआई बैंक लिमिटेड (NSBL) ले बैंकिङ क्षेत्रमा उत्कृष्ट कार्यसम्पादन र नवप्रवर्तनका लागि सिंगापुरस्थित एसियन बैंकिङ एन्ड फाइनान्स (ABF) बाट सन् २०२६ का लागि चार प्रतिष्ठित अन्तर्राष्ट्रिय अवार्ड प्राप्त गरेको छ।
बैंकले होलसेल बैंकिङ अवार्ड्स अन्तर्गत ‘नेपाल डोमेस्टिक लिक्विडिटी म्यानेजमेन्ट बैंक अफ द इयर’ र ‘नेपाल डोमेस्टिक ट्रेड फाइनान्स बैंक अफ द इयर’ तथा रिटेल बैंकिङ अवार्ड्स अन्तर्गत ‘डोमेस्टिक रिटेल बैंक अफ द इयर–नेपाल’ र ‘एसएमई बैंक अफ द इयर–नेपाल’ अवार्ड जित्न सफल भएको हो।
यी अन्तर्राष्ट्रिय सम्मानले तरलता व्यवस्थापन, व्यापार वित्त, बैंकिङ अभ्यास तथा होलसेल र रिटेल बैंकिङ सेवामा बैंकले हासिल गरेको उत्कृष्टता र नवप्रवर्तनप्रतिको प्रतिबद्धतालाई अन्तर्राष्ट्रिय स्तरमा मान्यता दिएको बैंकले जनाएको छ।
बैंकले यस सफलताका लागि आफ्ना सम्मानित शेयरधनी, ग्राहक तथा नियामक निकायप्रति हार्दिक आभार व्यक्त गर्दै उनीहरूको विश्वास, सहयोग र मार्गदर्शनले नै यो उपलब्धि सम्भव भएको उल्लेख गरेको छ। साथै, यस सम्मानले भविष्यमा अझ उत्कृष्ट सेवा प्रदान गर्दै देशको आर्थिक विकास र समृद्धिमा थप योगदान गर्न प्रेरणा मिलेको बैंकको भनाइ छ।
नेपाल एसबीआई बैंकले विगत ३२ वर्षदेखि निरन्तर बैंकिङ सेवा प्रदान गर्दै आएको छ। हाल बैंकले देशभर १०३ शाखा, २२ एक्सटेन्सन काउन्टर, ७ प्रदेश कार्यालय, २१ शाखारहित बैंकिङ इकाइ, १२७ एटीएम तथा एक कर्पोरेट कार्यालय मार्फत आफ्ना ग्राहकलाई सेवा प्रदान गरिरहेको छ।
