संयुक्त अरब इमिरेट्स (युएई)मा इरानले सुरु गरेको प्रतिकारात्मक मिसाइल तथा ड्रोन आक्रमणबाट कम्तीमा तीन जनाको मृत्यु भएको छ भने ५८ जना घाइते भएका छन्। युएईको रक्षा मन्त्रालयले जारी गरेको विज्ञप्तिमा यो जानकारी दिइएको हो।
इरानले अमेरिका तथा इजरायलको आक्रमणको जवाफमा खाडी क्षेत्रमा प्रतिकारात्मक अभियान सुरु गरेको बताइएको छ। युएईले कुल १६५ वटा ब्यालिस्टिक मिसाइलहरू पत्ता लगाएकोमा १५२ वटालाई नष्ट गरेको र दुईवटा क्रुज मिसाइललाई पनि रोकेको जनाएको छ।
यसैगरी, कुल ५४१ वटा इरानी ड्रोनहरू पत्ता लागेका थिए, जसमध्ये ५०६ वटालाई अन्तरिक्षमै रोकेर नष्ट गरिएको रक्षा मन्त्रालयले उल्लेख गरेको छ।
आक्रमणबाट मृत्यु हुने तीनजनामा एकजना पाकिस्तानी, एकजना नेपाली र एकजना बङ्गलादेशी नागरिक रहेका छन्। युएईमा ठूलो सङ्ख्यामा दक्षिण एसियाली कामदारहरू कार्यरत छन्, जसमा नेपालीहरू पनि उल्लेख्य सङ्ख्यामा छन्।
यस घटनाले खाडी क्षेत्रमा तनाव थप बढाएको छ। युएई सरकारले आफ्नो सार्वभौमिकता तथा अन्तर्राष्ट्रिय कानुनको उल्लङ्घन भएको भन्दै इरानको आक्रमणको निन्दा गरेको छ।
