असोज १०, ११ र १२ गतेको अविरल वर्षाका कारण सुनकोशी र रोशी खोलको बाढीले क्षतिग्रस्त बनाएको बिपी राजमार्ग जापान सरकारले पुन:निर्माण गरिदिने भएको छ । जापानी सहयोग नियोग (जाईका)को अनुदान सहयोगमा निर्माण भएको उक्त राजमार्ग पुनर्निर्माण पनि जाइकाले नै गरिदिने भएको हो ।
ठाउँ ठाउँमा झरेको पहिरोका कारण राजमार्ग क्षतिग्रस्त भएपछि नेपाल सरकारले पुन:निर्माणका लागि सहयोग गर्न जाईकालाई आग्रह गरेको थियो । परराष्ट्र मन्त्रालयमार्फत जाईकालाई पुन:निर्माणमा सघाउन आग्रह गरिएकोमा जाईकाले स्थलगत अवलोकन पश्चात आवश्यक निर्णय दिइने जनाएको थियो ।
यस अनुसार जाईकाको प्राविधिक टोलीले कार्तिक १२ र १३ गते क्षतिग्रस्त सडकको स्थलगत अवलोकन गरेको थियो । प्राविधिक टोलीमार्फत अवलोकन गरे पश्चात जाईकाले भौतिक पूर्वाधार तथा यातायात मन्त्रालयमा अध्ययन विवरण बुझाएको छ ।
राजमार्ग अन्तर्गत ११ स्थानमा बाटो पूर्णरुपमा क्षति भएको र चौकीडाँडा–कालढुङ्गा १८ किलोमिटरमध्ये करिब १२ किलोमिटर सडक पूर्णरूपमा क्षति भएको छ । त्यस क्रममा छलफल हुँदा जाईकाले उक्त १२ किलोमिटर खण्डमा स्थाई संरचना बनाउन सहयोग गर्ने जनाएको यातायात मन्त्रालयले बताएको छ ।
भौतिक पूर्वाधार तथा यातायात मन्त्रालयका अनुसार बिपी राजमार्ग पुन:निर्माण गर्न करिब ७ अर्ब रुपैयाँ लाग्ने अनुमान गरिएको छ ।
पूर्वी तराईलाई राजधानीसँग जोड्ने १६० किलोमिटर लम्बाईको बिपी राजमार्ग जापानले सन् १९९६ मा निर्माण सुरु गरेर २०१५ मार्चमा निर्माण सम्पन्न गरी नेपाल सरकारलाई हस्तान्तरण गरेको थियो । तर, हस्तान्तरण भएको २ महिना पनि नहुँदै २०७२ बैशाख १२ गतेको भूकम्पका कारण राजमार्गको ५ ठाउँमा क्षति पुगेको थियो । भूकम्पपछिको पुनर्निर्माण पनि जापानले नै गरिदिएको थियो । त्यसबेला १८ महिना लगाएर जाईकाले नै पुन:निर्माण गरिदिएको थियो ।
बिपी राजमार्ग जापान सरकारको २२ अर्ब रुपैयाँ अनुदान सहयोगमा निर्माण भएको थियो ।
