धितोपत्र सम्बन्धी (पहिलो संशोधन) विधेयक, २०८१ लाई दफावार छलफलको लागि प्रतिनिधिसभाको अर्थ समितिमा पठाईएको छ। आज बसेको प्रतिनिधिसभाको बैठकले “धितोपत्र सम्बन्धी (पहिलो संशोधन) विधेयक, २०८१ लाई दफावार छलफलको लागि सम्बन्धित समितिमा पठाईयोस्” भन्ने प्रस्ताव सर्वसम्मतले पारित गरेको हो ।
बैठकमा अर्थ मन्त्री विष्णु प्रसाद पौडेलले “धितोपत्र सम्बन्धी (पहिलो संशोधन) विधेयक, २०८१ लाई दफावार छलफलको लागि सम्बन्धित समितिमा पठाईयोस्” भनी प्रस्ताव पेश गरेका थिए । यस संगै अब यस विधेयकमाथि र विधेयकमा परेका संशोधनमाथि समितिमा दफावार छलफल हुने छ ।
धितोपत्र सम्बन्धी ऐन, २०६३ लाई संशोधन गर्नको लागि सरकारले यो बिधेयकले ल्याएको हो । धितोपत्र निष्कासन र व्यवस्थित कारोबार तथा धितोपत्र बजारको प्रभावकारी नियमन गर्न विद्यमान कानूनी व्यवस्थालाई समसामयिक संशोधन गर्न आवश्यक भएको र सरोकारवाला निकायहरुको सहभागिता तथा परामर्शमा विधेयकको मस्यौदा तयार गरिएको अर्थ मन्त्रालयले जनाएको छ।
आजको बैठकले आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८१ लाई पनि दफावार छलफलको लागि सम्बन्धित समितिमा पठाउने प्रस्ताव पारित गरेको छ।
