कतारका लागि प्रस्तावित राजदूत रमेशचन्द्र पौडेलले कतारमा नेपालको पानी बिक्री गर्न आफूले पहल गर्ने बताएका छन् । आफू राजदूत भएर गएपछि नेपालको पानी कतारमा निकासीका लागि पहल गर्ने उनले बताएका हुन् ।
मंगलबार सिंहदरबारस्थित संसदीय सुनुवाइ समितिमा सांसदहरूको प्रश्नको जवाफ दिँदै पौडेलले कतारमा पानी बिक्री गर्न जटिल रहेको भएपनि आफूले पहल गर्ने बताएका हुन् । सांसदहरूले नेपालको पानी कतारमा निर्यात गर्न सकिन्छ कि सकिँदैन भन्ने जिज्ञासा राखेपछि पौडेलले आफूले पहल गर्ने बताएका हुन् ।
‘कतार पुर्याएर बिक्री गर्न त्यत्तिकै जटिल चाहिँ छ, तर मैले मेरो तर्फबाट पहल गर्नेछु’ उनले भने ।
उनले कतारमा रहेका नेपाली श्रमिकका बारेमा आफूलाई ज्ञान र अनुभव रहेको बताउँदै श्रमिकको पक्षमा काम गर्ने पनि प्रतिवद्धता जनाएका छन् ।
‘कतारमा श्रमिकको न्यूनतम तलब १ हजार रियाल, ५ सय रुपैयाँ आवासका लागि र ३ सय रियाल खाना खर्च भनेर दिने गरेको रहेछ, यसलाई नेपालीमा रूपान्तरमा गर्दा तुलनात्मक रूपमा कम नै हो’ उनले भने, ‘यसका लागि आफ्नो क्षमताले भ्याएसम्म काम गर्छु ।’
