नेपाल सरकारको मुख्यसचिवमा एकनारायण अर्याललाई नियुक्त भएका छन् । बिहीबार साँझ बसेको मन्त्रिपरिषद् बैठकले गृह मन्त्रालयका सचिव अर्याललाई मुख्यसचिव नियुक्त गरेको हो ।
मुख्य सचिव लीलादेवी गडतौला शुक्रबारदेखि उमेर हदका कारण अनिवार्य अवकाशमा जान लागेसँगै सरकारले मुख्यसचिवमा अर्याललाई नियुक्त गरेको हो। यद्यपी अर्याल सचिवको बरियतामा चौथो नम्बरमा रहेका थिए ।
सचिवहरु मध्ये सबैभन्दा वरिष्ठ योजना आयोगका सचिव तोयनारायण ज्ञवाली थिए। दोस्रो नम्बरमा खरिद अनुगमन कार्यालयका सचिव रामकृष्ण सुवेदी र तेस्रो नम्बरमा महिला, बालबालिका तथा जेष्ठ नागरिक मन्त्रालयका सचिव दिनेश भट्टराई थिए । तर सरकारले चौथो बरियताका सचिव अर्याललाई मुख्य सचिव बनाएको हो ।
सरकारले चौथो नम्बरमा रहेका गृह मन्त्रालयका सचिव एकनारायण अर्याललाई मुख्सचिव नियुक्त भएपछि पहिलो बरियतामा रहेका ज्ञवालीले राजीनामा दिएका छन्। आफुभन्दा कम बरियताको सचिवलाई मुख्य सचिव बनाएपछि उनले सचिव पदबाट राजीनामा दिएका हुन् । उनी सचिवको ५ वर्षे कार्यकाल सकेर भदौ २२ गते अनिवार्य अवकाशमा जाँदै थिए ।
