आज भदौ ९ गते आइतबार संघीय संसद, प्रतिनिधि सभा अन्तर्गत अर्थ समितिको बैठक बस्दै छ । बैठक बिहान ११ बजेको लागि बोलाईएको छ ।
आजको बैठकमा बैङ्किङ्ग कसूर तथा सजाय (दोस्रो संशोधन) विधेयकमाथि छलफल हुने छ । छलफलको लागि अर्थ समितिले अर्थ मन्त्रीलाई आमन्त्रण गरेको छ ।
त्यस्तै आज १ बजे सार्वजनिक लेखा समितिको बैठक पनि बस्दै छ । बैठकमा उद्योगहरुको डेडिकेडेट तथा ट्रंक लाइनको विद्युत बक्यौता विवादबारे छलफल हुने छ ।
यी बाहेक आज उद्योग तथा वाणिज्य र श्रम तथा उपभोक्ता हित समिति, कानून, न्याय तथा मानव अधिकार समिति, र कृषि, सहकारी तथा प्राकृतिक स्रोत समितिको बैठक पनि बस्दै छ ।
उद्योग समितिको बैठकमा त्रिभुवन अन्तरार्ष्ट्रिय विमानस्थलभित्र रहेको नेपाल आयल निगमको इन्धन भण्डारणको स्थानान्तरणका सम्बन्धमा छलफल हुने छ । त्यस्तै संसदीय अध्ययन तथा सुझाव समिति (पेट्रोलियम पदार्थको आपूर्ति र वितरण व्यवस्थालाई व्यवस्थित गर्न अध्ययन गरी राय सुझाव सहितको प्रतिवेदन पेश गर्ने) प्रतिवेदन, २०७१ ले बैकल्पिक उर्जाको रुपमा इथानोलको सम्भाव्यता अध्ययन गर्ने सम्बन्धमा दिएको निर्देशनको हालसम्मको कार्यान्वयनको अवस्थाका बारेमा छलफल हुनेछ ।
कानून, न्याय तथा मानव अधिकार समितिको बैठकमा बिधायन सम्बन्धमा व्यस्था गर्न बनेको बिधेयकमा छलफल हुने छ भने कृषि समितिको बैठकमा भूमि व्यवस्था, सहकारी तथा गरिबी निवारण मन्त्रालयबाट सम्पादन हुने कार्यहरुको प्राथमिकता, कार्यक्रम तथा कार्ययोजना, कार्यसम्पादनमा रहेका समस्या, मन्त्रालयमा बजेट लगायतका सम्बन्धमा छलफल हुदै छ।
