प्रधानमन्त्री केपी शर्मा ओलीले कर्मचारीहरुले फाइलमा ‘सिग्नेचर’ गर्न डराउनुपर्ने अवस्था नरहेको बताएका छन् । मंगलबार सिंहदबारमा सबै मन्त्रालयका सचिवहरुलाई निर्देशन दिँदै प्रधानमन्त्री ओलीले कुनै निर्णयमा हस्ताक्षर गरेकै आधारमा अख्तियारले समात्छ कि भनेर नडराउन आग्रह गरेका हुन् ।
‘कर्मचारीले राम्रो नियतले काम गर्दा परेका अप्ठेरामा सरकारले संरक्षण गर्छ, राम्रो काम गर्दा असुरक्षित महशुस गर्नुपर्दैन’ प्रधानमन्त्री ओलीले भने ।
सरकारले व्यक्तिगत आग्रह, पूर्वाग्रह र पक्ष वा विपक्ष नहेर्ने भन्दै उनले काम गर्ने र नगर्ने बीचको फरक हेर्ने बताए ।
उनले सरकारको आयुका सम्बन्धमा पनि चिन्ता नगर्न पनि आग्रह गरे । प्रधानमन्त्री ओलीले आफू दुई वर्ष प्रधानमन्त्री हुने र त्यसपछि शेरबहादुर देउवा प्रधानमन्त्री हुने भन्दै सरकारको स्थिरतामा आशंका नगर्न अनुरोध गरेका छन् ।
