सञ्चार तथा सूचना प्रविधिमन्त्री जगदीश खरेल पदबाट राजीनामा दिएका छन् । उनले आज सोमबार प्रधानमन्त्री सुशिला कार्की समक्ष राजीनामा दिएका हुन्।
फागुन २१ गते हुने प्रतिनिधि सभा निर्वाचन लड्ने भएकोले उनले राजीनामा दिएका हुन् । उनी राष्ट्रिय स्वतन्त्र पार्टीबाट ललितपुर २ मा चुनाव लड्ने बताईएको छ।
वर्तमान राष्ट्रिय आवश्यकता, लोकतान्त्रिक प्रणालीको दीर्घकालीन सुदृढीकरण र जनअपेक्षाको परिप्रेक्ष्यमा अब दलीय राजनीतिमार्फत सक्रिय एवं उत्तरदायी भूमिका निर्वाह गर्नु वाञ्छनीय भएको निष्कर्षमा आफु पुगेको उनले राजीनामा पत्रमा उल्लेख गरेका छन् । वर्तमान सरकारको स्वतन्त्र पहिचानमा आँच आउन नदिन दलीय राजनीतिको मैदानमा छिर्नुअघि नै पदबाट राजीनामा दिने निर्णय लिएको उनले बताएका छन्।
उनले आफ्नो सार्वजनिक जीवन राष्ट्र, नागरिक, लोकतन्त्र, सुशासन र मानव गरिमाको उन्नयनमा समर्पित रहने अटल प्रतिबद्धता व्यक्त गरेका छन्।
