नेपाल उद्योग वाणिज्य महासंघले नेपाल धितोपत्र बोर्ड (सेबोन)को सञ्चालक समितिबाट आफ्ना प्रतिनिधिलाई फर्काएको छ । महासंघले सेबोनमा आफ्नो प्रतिनिधिका रुपमा महानिर्देशक गोकर्ण अवस्थिलाई पठाएको थियो । तर, उनलाई हालै मात्रै महासंघले फिर्ता बोलाएको स्रोतले जनाएको छ ।
सेबोन स्रोतका अनुसार अब अवस्थिको ठाउँमा अर्को व्यक्ति पठाउने वा नपठाउने भन्ने बारे महासंघबाट कुनै निर्णय आइसकेको छैन ।
धितोपत्र बोर्ड सञ्चालक समितिमा अर्थ मन्त्रालय, कानुन मन्त्रालय, नेपाल राष्ट्र बैंक, उद्योग वाणिज्य महासंघ र नेपाल चार्टर्ड एकाउन्टेन्ट संस्थाबाट १–१ जना प्रतिनिधि रहँदै आएका छन् । यसअघि महासंघबाट उपाध्यक्ष सुरकृष्ण वैद्य प्रतिनिधि थिए । उनलाई फिर्ता बोलाउँदै अध्यक्ष चन्द्र ढकालले महानिर्देशक अवस्थिलाई पठाएका थिए । अहिले उनलाई पनि फिर्ता बोलाएका हुन् ।
यसअघि निजी क्षेत्रको समेत प्रतिनिधित्व रहेको खनाल आयोगले सेबोनबाट निजी क्षेत्रको प्रतनिधि हटाउनुपर्ने सुझाव दिएको थियो ।
