प्रधानमन्त्री केपी शर्मा ओलीका आर्थिक तथा विकास सल्लाहकार डा. युवराज खतिवडाले उद्यम व्यवसायका क्षेत्रमा देखिएका समस्या आगामी बजेटले सम्बोधन गर्ने बताएका छन् । नेपाल उद्योग तथा व्यवसायी महासंघको केन्द्रीय कमिटिको बैठकलाई सम्बोधन गर्दै पूर्वअर्थमन्त्री समेत रहेका डा. खतिवडाले चालु आर्थिक वर्षमा ५ प्रतिशतको आर्थिक वृद्धिदर हासिल हुन सक्ने पनि बताएका छन् ।
चालू आर्थिक वर्षमा आर्थिक वृद्धिदर ४.५ देखि ५ प्रतिशतको हाराहारीमा हुने बताउँदै उनले उत्पादनमुलक उद्योगको वृद्धिदर गत वर्ष नकारात्मक भएपनि यो वर्ष सकारात्मक रहेको र निर्माण र सेवा क्षेत्रका सूचकहरु पनि सकारात्मक रहेको बताए ।
अहिले उत्पादित तयारी वस्तु भन्दा कच्चा पदार्थको भन्सार मूल्य बढी भएकोले त्यसमा सम्बोधन गर्नुपर्ने र औद्योगिक कच्चा पदार्थ आयातलाई सहजिकरण गर्ने गृहकार्य भईरहेको समेत खतिवडाले जानकारी दिए ।
कार्यक्रममा महासंघका अध्यक्ष भागिरथ सापकोटाले सरकारले गठन गरेको उच्च स्तरीय आर्थिक क्षेत्र सुधार सुझाव आयोगले निजी क्षेत्रका अघिकांश सुझाव समेटेको बताउँदै उक्त आयोगको प्रतिवेदन कार्यान्वयन गरेर जानुपर्ने बताएका छन् ।
