उर्जा, जलस्रोत तथा सिँचाइ राज्यमन्त्री पूर्णबहादुर तामाङ (कान्छाराम)ले ऊर्जा सचिव सुरेश आचार्यलाई स्पष्टीकरण सोधेकामा सचिवले प्रष्टिकरण बुझाएनन् । उनले राज्यमन्त्रीले विना कुनै कारण र प्रक्रियासमेत अबलम्बन नगरी सोधेको स्पष्टीकरणको जवाफ दिन अस्वीकार गरेका छन् ।
राज्यमन्त्री तामाङले गत चैत २८ गते सचिव आचार्यलाई २४ घण्टे स्पष्टीकरण सोधेका थिए । तर, हालसम्म सचिव आचार्यले प्रष्टिकरण बुझाएका छैनन् ।
राज्यमन्त्री तामाङले भने शुक्रबारसम्म सचिवले स्पष्टीकरण नदिएको र आइतबार फेरि स्पष्टीकरण सोध्ने बताएका छन् ।
‘आजसम्म सचिवले स्पष्टीकरण दिएको छैन, आइतबार फेरि सोध्छु’ राज्यमन्त्री तामाङले भने, ‘फेरि सोध्दा पनि दिएन भने अदालतमा मुद्दा हाल्ने तयारी गरेको छु ।’
जलस्रोत तथा सिँचाइ विभागले चैत २५ गते आयोजना गरेको सिँचाइ दिवस एवं ७२औँ वार्षिक उत्सव कार्यक्रममा राज्यमन्त्री तामाङ प्रमुख अतिथि थिए । तर, आफू सहभागी कार्यक्रम सचिव आचार्यले बहिष्कार गरेको भन्दै राज्यमन्त्री तामाङले स्पष्टिकरण सोधका हुन् ।
