उद्योग, वाणिज्य तथा आपूर्तिमन्त्री दामोदर भण्डारीले उद्योग मन्त्रीले उद्योगी व्यवसायीको पक्षमै बोल्नुपर्ने बताएका छन् । प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिमा मंगलबार सिमेन्ट उद्योगीसँगको छलफलमा मन्त्री भण्डारीमाथि सांसदहरुले उद्योगीको पक्षमा लागेको टिप्पणी गरेका थिए ।
यसपछि मन्त्री भण्डारीले सरकारको काम नीतिमा भएको जटिलता हटाउने भएको बताउँदै वस्तुको मूल्य बजारले नै निर्धारण गर्ने बताए । ‘उद्योगमन्त्री उद्योगीको पक्षमा नबोलेर कसको पक्षमा बोल्छ त ?’ बैठकपछि उनले भने ।
मन्त्री भण्डारीले सिमेन्टको भाउका विषयमा अध्ययन कार्यदल बनाइएको र अबको एक सातादेखि १० दिनभित्र उक्त कार्यदलले सिमेन्टको उत्पादन लागतबारे यथार्थ सार्वजनिक गर्ने पनि बताए । उनले अहिले उद्योगहरु क्षमताको निकै कम अनुपातमा मात्रै चलिरहेको बताउँदै सरकारी स्वामित्वका हेटौंडा र उदयपुर सिमेन्टले पनि घाटा खाइरहेको बताएका छन् ।
‘हिजो हामीले लोडसेडिङ मुक्त भन्यौं, तर आज पनि लोडसेडिङ छ । लोडसेडिङ मुक्त गर्न सरकारले पहल गर्नेछ,’ उनले भने, ‘सिमेन्टको भाउ बढाइएको कारण खोज्ने हो भने त्यसका अनेक कारण छन् ।’
