काठमाडौँको झोरबाट सोमबार राती स्रोत नखुलेको अमेरिकी डलर, युरो र केही नेपाली रुपैयाँसहित एक जना पक्राउ परे । काठमाडौँको झोरबाट काठमाडौं उपत्यका अपराध अनुसन्धान कार्यालयको टोलीले ना ७ ख १६५२ नम्बरको ट्रकमा राखेर करोडौँ रुपैयाँसहित पक्राउ गरेका व्यक्ति सिन्धुपाल्चोकको भोटेकोशी गाउँपालिका–१ का ४३ वर्षीया फुच्चे भनिने कुसाङ लामा रहेको खुलेको छ ।
सोमबार राती नै ट्रकसहित पक्राउ परेका उनीको साथबाट करोडौँ रुपैयाँ बराबरको डलर र युरो बरामद गरिएको भएपनि प्रहरीलाई पैसा गनेर त्यसको नेपाली रुपैयाँ कति हुन्छ भनेर हिसाब गर्न समय लागेको थियो । मंगलबार अपरान्हसम्म गणना गरेर आजको विनिमय दर अनुसार हिसाब निकाल्दा उनको साथबाट बरामद भएको पैसा २५ करोड १ लाख ६० हजार ३३८ रुपैयाँ बराबर रहेको खुल्यो ।
त्यसपछि मंगलबार प्रहरीले पत्रकार सम्मेलन गरेर विषय सार्वजनिक गरेको छ । प्रहरीका अनुसार ट्रकको क्याबिनमा फल्स बटम बनाएर लामाले त्यसमा पैसा लुकाएर केरूङतर्फ लैजाँदै गरेका थिए । ट्रकको पछाडि भने खाली नै थियो । तर, कुनै सामान लिन नभई फर्किँदा केही पाइयो भने बोकेर ल्याउने लामाले खाली गाडी लगेको बयानमा छन् ।
प्रहरीका अनुसार केरूङबाट दुई जनाले लामालाई भरियाको रुपमा प्रयोग गरेको पाइएको छ । उनी भरियाको रूपमा चालक भएर काम गरिरहेको प्रारम्भिक अनुसन्धानबाट खुले पनि थप विषय विस्तृत अनुसन्धानबाट मात्रै खुल्ने प्रहरीले जनाएको छ । यद्यपी, उक्त पैसा अवैध सुन किन्नका लागि चीनतर्फ तस्करी भइरहेको हुन सक्ने आशंक गरिएको छ । पक्राउ परेका लामालाई राजस्व अनुसन्धान विभागको जिम्मा लगाइने प्रहरीले जनाएको छ ।
उनी यसअघि पनि ७ किलो सुन तस्करी प्रकरणमा पक्राउ परेर ५ वर्ष जेल बसेर छुटेका थिए ।
