नेपाल क्रिकेट संघ (क्यान)ले आयोजना गर्न लागेको नेपाल प्रिमियर लिग टि २० क्रिकेट प्रतियोगिताको लागि मार्की खेलाडी घोषणा भएका छन् । क्यानले आज ८ जना मार्की खेलाडी घोषणा गरेको हो ।
आज घोषणा भएका मार्की खेलाडीमा रोहित कुमार पौडेल, दिपेन्द्र सिंह ऐरी, सन्दिप लामिछाने, सोमपाल कामी, करण केसी, आशिफ शेख, कुशल भुर्तेल, र कुशल मल्ल रहेका छन् । यी ८ खेलाडी छुट्टा छुट्टै ८ टिममा रहने छन् । अन्य खेलाडीको चयन अक्सन मार्फत हुने छ । अक्सनको मिति छिट्टै तोकिने क्यानले जनाएको छ ।
प्रतियोगितामा ८ टिम रहने छन्। विडिङ प्रक्रियाबाट ८ टिमका टिम मालिक तय गरिसकिएको छ। कर्णाली, सुदूरपश्चिम, लुम्बिनी, पोखरा, चितवन, काठमाडौँ, जनकपुर र विराटनगर फ्रेनचाइज रहने छन् ।
क्यानका अनुसार कान्तिपुर पब्लिकेशनले ३ करोड ३३ लाख ३३ हजार ३ सय ३९ रुपैयाँ बिड गरेर टिम काठमाडौँको अपनत्व लिएको छ । त्यस्तै नेपाल टि २० क्रिकेट प्रालिले ३ करोड ५७ लाख रुपैयाँ विड गरेर टिम पोखराको अपनत्व लिएको छ।
त्यस्तै १ करोड ७६ लाख १ हजार रुपैयाँ बिड गरेर चितवन मेडिकल कलेजले टिम चितवनको अपनत्व लिएको छ। १ करोड ५१ लाखमा एमएडी ड्रिम्स स्पोर्ट्स प्रालीले टिम विराटनगरको अपनत्व लिएको छ।
फर्च्युन हेल्थ केयर प्रालीले १ करोड ८६ लाख ४ रुपैयाँमा टिम लुम्बिनीको अपनत्व लिएको छ भने २ करोड ५ लाखमा ड्रिम स्पोर्ट्स प्रालीले टिम जनकपुरको अपनत्व लिएको छ । त्यस्तै १ करोड ११ लाख ७० हजारमा हिमालयन विल्डर्स एण्ड इन्जिनियर्स प्रालीले टिम कर्णालीको अपनत्व लिएको छ । १ करोड ६८ लाख ८८ हजार ८ सय ८८ रुपैयाँमा एम्पायर स्पोर्ट्स म्यानेजमेन्ट प्रालीले टिम सुदूरपश्चिमको अपनत्व लिएको छ ।
मंसिर १५ गतेदेखि पुस ६ गतेसम्म नेपाल प्रिमियर लिग कीर्तिपुरस्थित त्रिवि मैदानमा हुँदैछ। प्रतियोगितामा विदेशी खेलाडी पनि सहभागी हुनेछन् । यद्यपि एक टिममा कति जना विदेशी खेलाडी राख्न पाइने भन्नेबारे क्यानले निर्णय गरिसकेको छैन ।
क्यानले पहिलोलोपटक आफ्नै व्यवस्थापनमा फ्रेञ्चाइज लिग आयोजना गर्न लागेको हो। यसअघि क्यानले नेपाल टी-२० लिगका लागि भारतीय कम्पनी सेभेन थ्रीसँग गरेको सम्झौता विवादमा परेको थियो।
