टेलिकम सेवाप्रदायक कम्पनी एनसेलले पेरिसमा जारी पारा ओलम्पिक्स २०२४ मा नेपाली खेलकुदमा देशका लागि अहिलेसम्मकै ठूलो पदक दिलाउन सफल पारा तेक्वान्दो खेलाडी पलेशा गोवर्द्धनलाई नगद पुरस्कारसहित सम्मान गर्ने भएको छ ।
पेरिस पारालिम्पिक्स २०२४ मा नेपालको प्रतिनिधित्व गर्दै कास्य पदक जितेकी पलेशालाई १० लाख रुपैयाँ पुरस्कार प्रदान गर्ने एनसलले जनाएको हो । साथै, अन्य सहभागी पारा खेलाडी तथा प्रशिक्षकलाई पनि थप १० लाख पुरस्कारसहित सम्मान गर्ने एनसेलले जनाएको छ ।
एनसेलले राष्ट्रिय पारा ओलम्पिक कमिटी (एनपीसी), नेपालसँग भइरहेको आफ्नो सहकार्यअनुरुप सम्मान घोषणा गरेको बताएको छ । एनसेलले गत वर्षदेखि एनपीसीसँग नेपाली पारा खेलाडीको समग्र तालिम र विकासका लागि ‘हामी तपाईंकै लागि’ थिमअन्तर्गत सहकार्य र सहयोग गर्दै आएको छ ।
‘म एकदमै हर्षित छु। तेक्वान्दोको यात्रा शुरु गरेको हिजामात्र जस्तो लाग्छ, त्यति बेला पारा ओलम्पिक्सको यस्तो उचाईमा पुग्छु र देशकै लागि ऐतिहासिक पहिलो पदक ल्याउनेछु भन्ने सोचेकै थिइनँ। मैले सपना देख्ने हिम्मत गरें र केही गर्ने मौका पाएँ र गरेरै पनि देखाएँ। नेपालको प्रतिनिधित्व गरेर पदक जित्न पाउँदा आफूलाई धन्य महसुस गरिरहेकी छु’, पलेशाले खुसी व्यक्त गर्दै भनेकी छिन् ।
एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले भने, ‘पलेशाको ऐतिहासिक उपलब्धि राष्ट्रिय गौरव हो । यो जित नेपालको र सम्पूर्ण पारा खेलाडीको कडा परिश्रम एवं उत्कृष्ट प्रदर्शनको नतिजा हो। एनपीसीसँगको सहकार्यमा पलेशाजस्ता च्याम्पियन र राष्ट्रिय पारा खेलाडीको प्रेरणा बनेर हौसला दिन प्रतिबद्ध छौं ।’
एनसेलले गत वर्ष देखि आफ्नो सेवा सञ्चालनको १८औं वार्षिकोत्सवको अवसरमा आफ्नो व्यावसायिक सामाजिक जिम्मेवारीअन्तर्गत एनपीसीसँग सहकार्यको घोषणा गरेको थियो ।
