पेरिस पारा ओलम्पिक खेलकुदमा नेपालका लागि ऐतिहासिक कास्य पदक जितेकी पलेशा गोवर्धन बुधबार बिहान काठमाडौँ आइपुग्ने भएकी छन् । त्रिभुवन अन्तर्राष्ट्रिय विमानस्थलमा ओर्लिएपछि उनलाई नगर परिक्रमा गराइने राष्ट्रिय खेलकुद परिषदले जनाएको छ ।
खेलकुद परिषदका अनुसार बिहान ८ बजे त्रिभुवन विमानस्थलमा ओर्लने पलेसा सहितको नेपाली टीमलाई एयरपोर्ट, गौशाला, पुरानो बानेश्वर, मैतीदेवी, डिल्लीबजार, बागबजार, भद्रकाली, शहीदगेट, त्रिपुरेश्वर चोक हुँदै राष्ट्रिय खेलकुद परिषद्को प्राङ्गणमा लगिनेछ । त्यहाँ उनलाई राष्ट्रिय खेलकुद परिषदबाट सम्मान प्रदान गरिनेछ ।
पलेसाले गत शुक्रबार राति नेपालका लागि कास्य पद जितेकी थिइन् । कुनै पनि किसिमको ओलम्पिक खेलकुदमा नेपालले जितेको यो पहिलो पदक हो । सरकारको पुरस्कारसम्बन्धी नियमावलीअनुसार पलेसाले ६५ लाख रुपैयाँ प्राप्त गर्ने पक्का भइसकेको छ ।
