बिजनेशपाना डटकम (www.businesspana.com) विधिवत् रुपमा आर्थिक अनलाइन मिडियाका रुपमा आम पाठकमाझ आएको छ । सूचना प्रविधिको उपयोग बढ्दै गईरहेका बेला कुनै एक अनलाइन सञ्चारमाध्यमको जन्म हुनु वा सञ्चालनमा आउनु आफैमा अनौठो विषय होइन । मुख्य कुरा सञ्चारमाध्यमहरु मूलुकको सर्वाङ्गीण विकासको उदेश्यमा केन्द्रित छन् कि कुनै ‘एजेण्डा सेट’को लागि पैरवी गर्ने थलोका रुपमा विकसित भइरहेका छन् भन्ने हो ।
खासगरी कोभिड–१९ को विश्वव्यापी प्रभाव र मध्यपूर्वसहित विश्वका कतिपय मुलुकमा युद्धका छनक देखिए पश्चात् त्यसको प्रभाव नेपाली अर्थतन्त्रमा पनि परेको अवस्था छ । उत्पादनमा आएको संकुचनले विज्ञापन बजार साँघुरिएको छ भने समग्र अर्थतन्त्र नै लयमा आउन सकेको छैन । बजारको यो तथ्य जान्दाजान्दै पनि नेपाली अर्थतन्त्रको विकास र बिस्तार तथा निजी क्षेत्रको बिस्तारबाट राष्ट्रिय पूँजीको विकास गर्दै समाजवादमा पुग्ने संविधानको लक्ष्यमा सारथी बन्ने पवित्र ध्येयका साथ हामी आएका छौं ।
हामीले नेपाली अर्थतन्त्रमाथि मडारिएको कालो बादलमात्रै देखिरहेका छैनौँ, क्षितिजबाट अघि बढ्दै गरेका आशाका किरणहरु पनि देखिरहेका छौँ । मूलुकको अर्थतन्त्रको विकासमा सघाउने, बाह्य र आन्तरिक अनेकन कारणले दबावमा रहेको अर्थतन्त्रमा सुधार ल्याउने उदेश्यमा केन्द्रित बहस तथा पैरवी गर्ने दायित्वप्रति हामी दृढसंकल्पित छौँ ।
पछिल्लो समय विज्ञापन क्षेत्रमा आएको संकुचन र बजारमा अनेकरुपमा चलिरहेका ‘सिन्डिकेट’, ‘कार्टेलिङ’ ईत्यादिका कारणले सञ्चारमाध्यमहरुको सम्पादकीय स्वतन्त्रतामा ह्रास आएको हाम्रो बुझाई छ । बजारको कुनैपनि विषयले आम पाठकको सूचनाको अधिकारमाथि नकारात्मक प्रभाव पार्नु हुँदैन भन्नेमा सदैव सचेत र प्रतिबद्ध छौँ ।
विश्वव्यापीकरण, खुला बजार अर्थतन्त्र, राष्ट्रिय पूँजी निर्माण, घरेलु अर्थतन्त्र आदिका सम्बन्धमा प्रचलनमा रहेका राष्ट्रिय-अन्तर्राष्ट्रिय मान्यता र सिद्धान्तमा विश्वास राख्दै उपभोक्ता अधिकारको पक्षमा समर्पित रहनु हाम्रो मूल उदेश्य हुनेछ । हाल नेपालमा सञ्चालनमा रहेका कुनैपनि आर्थिक मिडियासँग प्रतिस्पर्धा गर्नु हाम्रो लक्ष्य होईन । विश्वव्यापी मान्यता र नेपालमा भएका असल अभ्यासलाई बढावा दिँदै आर्थिक धारका मिडियाको मानकको रुपमा आफुलाई प्रस्तुत गर्ने जमर्को हामीले गर्नेछौँ ।
अनलाइन मिडियाहरूको बाढी आइरहेको वर्तमान समयमा ‘कर्पोरेट डील’ गर्दै हरेक मिडियाले समाचारलाई ‘द्रव्य’ आर्जनको भाँडो र सूचनालाई ‘बार्गेनिङ’ गर्ने हतियार बनाउँछन् भन्ने आम बुझाईलाई चिर्दै सत्य, तथ्य र सही सूचनामा आधारित व्यावसायिक पत्रकारिता बिजनेशपाना डटकमको मूल चरित्र हुनेछ । आम पाठकवर्ग, विज्ञापनदाता, उद्यमी-व्यवसायी तथा शुभेच्छुकबाट अमूल्य साथ, सहयोग र सद्भाव प्राप्त हुनेमा हामी विश्वस्त छौं ।
