सुनचाँदी व्यवसायीहरुको आन्दोलनका कारण आज असार १५ गते सुनचाँदीको भाउ नै तोकिएको छैन । हरेक दिन बिहान १०ः३० बजे आसपास सुनचाँदीको भाउ सार्वजनिक हुने भएपनि आज भने मूल्य सार्वजनिक गरिएको छैन ।
नेपाल सुनचाँदी व्यवसायी महासंघका वरिष्ठ उपाध्यक्ष दियशरत्न शाक्यका अनुसार सुनचाँदी व्यवसायीहरुको आन्दोलनको कार्यक्रम अन्तर्गत आज भाउ नतोकिएको हो । ‘हामी निरन्तर आन्दोलनमा छौँ, आन्दोलनकै कार्यक्रम अन्तर्गत आजबाट मूल्य सार्वजनिक गर्न पनि रोकेका छौँ’ उनले भने, ‘देशभरी नै पसल बन्द गरेर व्यवसायीहरु आन्दोलनमा सहभागी हुनु भएको छ ।’
‘भाउ नतोक्दा गहना किन्न आउने र बेच्न आउने ग्राहकलाई मर्का पर्ला नि ?’ भन्ने प्रश्नमा शाक्यले थप्छन्, ‘पसल नै बन्द भएपछि कारोबारको कुनै सवाल नै भएन नि ।’
उनका अनुसार आजबाट मूल्य तोक्न रोकिएको हो, अझै केही दिनसम्म यहीँ स्वरुपको आन्दोलन जारी रहने छ । ‘विकल्प केही निस्किन्छ कि भनेर त्यसतर्फ पनि सोचेका छौँ’ उनले भने ।
बजेटमार्फत सुनमा २ प्रतिशत विलासिता कर लगाइएको र गहनामा हिरा लगायतका बहुमूल्य पत्थर जडान गर्दा १३ प्रतिशत भ्याट लगाएको विरोधमा सुनचाँदी व्यवसायीहरु आन्दोलनमा छन् ।
