कोकाकोला उत्पादन गर्ने दुवै कम्पनीले चालु आर्थिक वर्ष २०८१/८२ को तेस्रो त्रैमासको अपरिस्कृत वित्तीय विवरण प्रकाशन गरेका छन्। प्रकाशित विवरण अनुसार यस अवधिमा दुवै कम्पनीको खुद नाफा घटेको छ ।
यस अवधिमा बोटलर्स नेपाल बालजुको खुद नाफा ७३.३२ प्रतिशतले घटेर १ करोड ५९ लाख कायम भएको छ । कम्पनीको आफ्नो उत्पादन बिक्रीको आम्दानी पनि ७ अर्ब १८ करोडबाट घटेर ७ अर्ब ७ करोडमा सिमित भएको छ। कम्पनीको उत्पादन बिक्रीको लागत पनि ५ अर्ब १४ करोडबाट बढेर ५ अर्ब २७ करोड पुगेको छ। यस अवधिमा कम्पनीको प्रति शेयर आम्दानी २४ रुपैयाँबाट घटेर ६ रुपैयाँ पुगेको छ। कम्पनीको चुक्ता पुंजी १९ करोड ४८ लाख छ भने रिजर्भमा ६ अर्ब ५ करोड रहेको छ।
त्यस्तै यस अवधिमा बोटलर्स नेपाल तराईको खुद नाफा पनि घटेको छ। यस अवधिमा बोटलर्स नेपाल तराईको खुद नाफा ६९.११ प्रतिशतले घटेर ८ करोड ७ लाख कायम भएको छ । कम्पनीको आफ्नो उत्पादन बिक्रीको आम्दानी पनि ५ अर्ब ८१ करोडबाट घटेर ४ अर्ब ९१ करोडमा सिमित भएको छ। यस अवधिमा कम्पनीको प्रति शेयर आम्दानी २८८ रुपैयाँबाट घटेर ८९ रुपैयाँ पुगेको छ। कम्पनीको चुक्ता पुंजी १२ करोड १० लाख छ भने रिजर्भमा ४ अर्ब ११ करोड रहेको छ।
