चन्द्रागिरी हिल्स लिमिटेडको लकइन अवधि खुलेपछि चन्द्रागिरी हिल्सको संस्थापक शेयरधनीको रुपमा रहेको हाथवे इन्भेष्टमेन्ट नेपाल लिमिटेडले चन्द्रागिरीको २ लाख कित्ता बढी शेयर बेचेको खुलेको छ। हाथवेले चन्द्रागिरी हिल्सको २ लाख ३२ हजार १ सय २२ कित्ता शेयर बेचेको हो ।
जुन कम्पनीको आर्थिक वर्ष २०८०/८१ को वित्तीय विवरणबाट प्रष्ट देखिन्छ । आईपीओ निष्काशन गर्ने बेलामा चन्द्रागिरी हिल्सले सार्वजनिक गरेको विवरणपत्रमा हाथवेसँग चन्द्रागिरीको २ लाख ७० हजार कित्ता शेयर थियो । आर्थिक वर्ष २०८०/८१ को अन्त्यमा भने हाथवेसँग चन्द्रागिरीको ३७ हजार ८ सय ७८ कित्ता शेयर मात्र बाँकि छ । हाथवेले बाँकि शेयर भने बिक्री गरेको हो ।
चन्द्रागिरीको लकइन अवधि २०८० माघ ८ गते सकिएको थियो । त्यसपछि हाथवेले चन्द्रागिरीको शेयर बिक्री गरेको हो ।हाथवेले कुन मूल्यमा ति शेयर बेच्यो भन्ने प्रष्ट छैन, तर औसतमा प्रति शेयर ९०० रुपैयाँका दरले शेयर बेचेको भएपनि कम्पनीले यसबाट २० करोड ८९ लाख बढी आम्दानी गरेको देखिन्छ। आर्थिक वर्ष २०८०/८१ मा हाथवेले कम्पनीको खुद नाफा ४५० प्रतिशतले बढेर ८ करोड ३९ लाख ९२ हजार पुगेको वित्तीय विवरण सार्वजनिक गरेको थियो। जसमा व्यवसायबाट भएको आम्दानी २५ करोड ८२ लाख थियो।
