आज कुथेली बुखरीको शेयर मूल्य हालसम्म कै उच्च बिन्दुमा पुगेको छ। आज कम्पनीको शेयर मूल्य ९.९८ प्रतिशतले बढेर २८ सय ४९ रुपैयाँमा पुगेको हो ।
यो कुथेलीको हालसम्म कै उच्च मूल्य मात्र नभई नेपाल स्टक एक्सचेन्ज नेप्सेमा सूचीकृत हाइड्रोहरु मध्ये कै हालसम्म कै उच्च मूल्य हो। यस अघि हाइड्रोहरु मध्ये चिलिमे जलविद्युत कम्पनीको शेयर मूल्यले उच्च बिन्दु अर्थात २ हजार ७ सय ९४ को बिन्दु कायम गरेको थियो । यो २०७१ सालमा थियो ।
आज कुथेलीले सो मूल्य पनि तोड्दै २८ सय ४९ रुपैयाँमा हाइड्रोको इतिहास कै उच्च मूल्य कायम गरेको हो । यद्यपि चिलिमेको तुलनामा कुथेलीको शेयर संख्या एकदमै न्यून रहेकोले कम्पनीको शेयर मूल्य बढिरहेको छ। नेप्सेमा कुथेलीको १२ लाख १८ हजार ६ सय ७५ कित्ता शेयर मात्र सूचीकृत छ । जस मध्ये हाल कम्पनीको पब्लिक शेयर २ लाख ४३ हजार ७ सय ३५ कित्ता मात्र कारोबार हुन्छ । बाँकि रहेको प्रमोटर शेयरको लकिंग अवधि नखुलेकोले कारोबार हुँदैन ।
यस कम्पनीले ०.९९८ मेगावाट क्षमताको सुस्पा बुखरी खोला जलविद्युत आयोजना निर्माण सम्पन्न गरि सन् २०१५ सेप्टेम्बरदेखि विद्युत उत्पादन गरिरहेको छ।
