नेपाल उद्योग वाणिज्य महासंघ (एफएनसीसीआई) ले नेपाल धितोपत्र बोर्डको सञ्चालक समिति सदस्यमा महानिर्देशक गोकर्ण अवस्थीलाई सिफारिस गरेको छ । पूँजी बजारको नियामक निकायका रुपमा रहेको धितोपत्र बोर्डमा महासंघको प्रतिनिधि सञ्चालक सदस्य हुने प्रावधान छ । जस अनुसार महासंघका अध्यक्ष चन्द्र ढकालले गत शुक्रबार महानिर्देशक अवस्थिलाई सिफारिस गरेका हुन् ।
यसअघि महासंघको प्रतिनिधित्व गर्दै उपाध्यक्ष सुरकृष्ण वैद्य सेबोनको सञ्चालक थिए । उनी जिल्ला नगरतर्फको उपाध्यक्ष भएकाले महासंघकै गतिविधिमा उनको व्यस्तता बढी भएपछि उनलाई फिर्ता ल्याउँदै अध्यक्ष ढकालले महानिर्देशक अवस्थीलाई सिफारिस गरेका हुन् ।
उनले सपथ ग्रहण भने गर्न बाँकी छ । अब बस्ने सेबोन सञ्चालक समितिको बैठकमै उनको पनि सपथ हुने बताइएको छ ।
अवस्थी विगत साढे ३ वर्षदेखि नेपाल उद्योग वाणिज्य महासंघको महानिर्देशक छन् । वाणिज्य शास्त्रमा स्नातकोत्तर गरेका उनी काठमाडौँ विश्वविद्यालयबाट राजनीतिक अर्थशास्त्रमा विद्यावारिधि गर्दैछन् ।
भारतीय जनसञ्चार संस्थानबाट विकास पत्रकारितामा डिप्लोमा गरेका अवस्थीसँग नेपालस्थित संयुक्त राष्ट्र संघ कार्यालयमा दिगो विकास लक्ष्य सल्लाहकारको रूपमा समेत काम गरेको अुनभव छ । दुई दशक सक्रिय पत्रकारिता गरेका अवस्थी नेपाल आर्थिक पत्रकार समाजका पूर्वअध्यक्ष पनि हुन । अवस्थीले नेपाल व्यवस्थापन संघले प्रदान गर्ने ‘मनेजर अफ द ऐयर २०२३’समेत प्राप्त गरेका छ्न् ।
