नेपाल स्टक एक्सचेन्ज नेप्सेमा ४५ दिनदेखि अध्यक्ष पद रिक्त रहेको छ। यस अघि नेप्सेमा अध्यक्ष रहेका शोभाकान्त पौडेल सचिवमा बढुवा भएसंगै नेप्सेमा अध्यक्ष पद रिक्त भएको हो।
वैशाख ३१ गते बसेको मन्त्रिपरिषद्को बैठकले सहसचिव रहेका शोभाकान्त पौडेलले सचिवमा बढुवा गर्ने निर्णय गरेको थियो। नेप्सेमा अर्थ मन्त्रालयले मन्त्रालय कै एक जना सहसचिवलाई अध्यक्षको रुपमा पठाउने गरेको छ। तर नेप्सेमा अध्यक्ष रिक्त भएको ४५ दिन बितिसक्दा पनि अर्थले नेप्सेमा अध्यक्ष नपठाएपछि नेप्सेमा केही महत्वपूर्ण कामहरु रोकिएका छन्।
नेप्सेले यहि असार मसान्तभित्र नै आर्थिक वर्ष २०८२/८३ को लागि नेप्सेको बजेट र कार्यक्रम नेप्सेको संचालक समितिबाट पारित गरिसक्नु पर्छ। हाल अध्यक्ष नहुँदा नेप्से संचालक समितिको बैठक बस्न सकेको छैन भने बजेट र कार्यक्रम पारित हुन पाएको छैन । असार मसान्तसम्म बजेट र कार्यक्रम पारित नभएमा नयाँ आर्थिक वर्षबाट नेप्सेलाई नियमित कामकाजमै समस्या पर्न सक्छ।
त्यस्तै नेप्सेको व्यवस्थापन समितिले पारित गरेको ‘साना तथा मझौला संगठित संस्थाको धितोपत्र सूचीकरण तथा कारोबार विनियमावली, २०८१ को मस्यौदा पनि संचालक समितिमा पुगेको छ। तर अध्यक्ष नभएर संचालक समितिको बैठक बस्न नसक्दा नियमावली पारित गर्ने कार्य पनि अड्किएको छ ।
अध्यक्ष पठाउनको लागि मन्त्रालयमा आग्रह गर्दा मन्त्रालयले छिट्टै पठाउने बताउने गरेको र तर अझै पनि नपठाएको नेप्सेले जनाएको छ । नयाँ अध्यक्ष आएपछि पहिलो काम नै नेप्सेको बजेट र कार्यक्रम पारित गर्ने, ‘साना तथा मझौला संगठित संस्थाको धितोपत्र सूचीकरण तथा कारोबार विनियमावली, २०८१ को मस्यौदाबारे छलफल गर्ने हुने बताईएको छ ।
