नेशनल लाइफ इन्स्योरेन्सको सहायक कम्पनी नेशनल क्यापिटल लिमिटेडले साधारणसभा आह्वान गरेको छ। कम्पनीले पुस २० गते साधारणसभा बोलाएको हो।
सभामा लाभांश सहितका विविध प्रस्ताव पेश हुने छन् । कम्पनीले हाल कायम चुक्ता पुँजी २० करोडको ७ प्रतिशतको दरले हुन आउने १ करोड ४० लाख रुपैयाँ बराबरको नगद लाभांश वितरण गर्ने प्रस्ताव गरेको छ। त्यस्तै कम्पनीले २ जना स्वतन्त्र संचालक राख्नको लागि नियमावली संशोधन गर्ने भएको छ।
कम्पनीले नेपाल धितोपत्र बोर्डबाट अनुमति लिएर मर्चेन्ट बैंकिङ सम्बन्धि सेवा प्रदान गर्दै आएको छ। क्यापिटलका प्रमुख कार्यकारी अधिकृत अर्पण खनाल रहेका छन् । खनाल सहितका लगानीकर्ताले सन् २०१८ मा खनाल प्रधानाङ्ग इन्भेष्टमेन्ट सर्भिसेज स्थापना गरेका थिए । थप पुँजी सहित प्रधानाङ्ग इन्भेष्टमेन्ट सर्भिसेजमा नेशनल लाइफ इन्स्योरेन्स भित्रिएर नेशनल क्यापिटल बनेको हो । नेशनल क्यापिटलमा नेशनल लाइफ इन्स्योरेन्सको बहुमत लगानी रहेको छ।
