लक्ष्मीपूजाको दिन विद्युतको आन्तरिक उच्च माग (पीक डिमाण्ड) १ हजार ६०२ मेगावाट मापन भएको छ । लोड डिस्प्याच सेन्टरका प्रमुख चन्दन घोषका अनुसार आन्तरिक रुपमा खपत भएर बढी भएको २५३ मेगावाट बिजुली भारत निर्यात भएको छ ।
जबकी, अघिल्लो दिन नेपाल र बंगलादेशबीचको साफ महिला फुटबलको फाइनल खेल हुँदा १ हजार ८ सय मेगावाट विद्युत खपत भएको थियो ।
यसवर्षको तिहारको लक्ष्मीपूजाको दिन काठमाडौँ उपत्यकामा विद्युतको उच्च माग ३९० मेगावाट पुगेको छ । यो गत वर्षको तुलनामा २४ मेगावाटले बढी हो ।
लक्ष्मी पूजाको दिन कलंकीको स्युचाटारस्थित लोड डिस्प्याच सेन्टरमा ऊर्जा, जलस्रोत तथा सिंचाई राज्यमन्त्री पूर्ण बहादुर तामाङ ‘कान्छाराम, नेपाल विद्युत प्राधिकरणका प्रबन्ध निर्देशक कुलमान घिसिङ, उपकार्यकारी निर्देशक मनोज सिलवालसहितको टोली पुगेको थियो ।
