नेकपा (एमाले)का सांसद गोकुल प्रसाद बाँस्कोटाले डेडिकेटेड र ट्रंक लाइनको महशुल विवाद कायम रहेकै बेला तत्कालिन सरकारले १६ अर्ब रुपैयाँ किन मिनाहा गर्यो भन्दै प्रश्न गरेका छन् । आइतबार बसेको सार्वजनिक लेखा समितिको बैठकमा उनले तत्कालीन सरकार र विद्युत प्राधिकरणको नेतृत्वलाई १६ अर्ब मिनाह किन दिइयो भन्ने प्रश्न गरेका हुन् ।
‘९ वर्षदेखि विद्युत प्राधिकरणको नेतृत्वमा को छ ? उठाउने भए यो समय पर्याप्त होइन ? मैले सञ्चारमन्त्री भएका बेला १ वर्षमा ५१ अर्ब राजश्व उठाइदिएको अनुभव छ । अचेल खुबै नो इफ नो बट भन्ने भाषा चलेको छ । म पनि भन्छु, नो इफ नो बट, विद्युत महशुल नउठाउनेलाई कारबाही गर्नुपर्छ कुरा क्लियर कट’ बाँस्कोटाले भने, ‘मलाई कुनै लोकरिझ्याइँ गर्नु पनि छैन, गलत कुराको आँधीबेहरी केही समय चल्ने हो, तर सत्य एउटै हुन्छ । तत्कालीन सरकार र विद्युत प्राधिकरणको नेतृत्वलाई प्रश्चन छ, १६ अर्ब मिनाह किन दिइयो ? एकातिर महशुल नउठाउने, अर्कोतिर हिरोइजम देखाउन पर्दैन । मिलेमतोमा महशुल छुट दिनेको लोकरिझ्याइँ पनि धेरै टिक्दैन । विद्युत प्राधिकरण राज्यको सम्पत्ति हो, कुनै एक पपुलिस्टको निजी सम्पत्ति होइन ।‘
