प्रधानमन्त्री केपी शर्मा ओलीले विद्युत महसुलको बक्यौताका सम्बन्धमा माओवादी केन्द्रका सांसदहरुलाई प्रतिप्रश्न गरेका छन् । प्रतिनिधिसभामा भएको प्रश्नोत्तर कार्यक्रममा प्रधानमन्त्री ओलीले महालेखा परीक्षकको कार्यालयले उद्योगीहरुबाट विद्युत बक्यौतबापत २२ अर्ब उठाउनुपर्छ भनेकोमा आफू अगाडीको सरकारले ६ अर्ब मात्रै उठाउने गरि निर्णय गरेको भन्दै ‘बाँकी १६ अर्ब खोइ ?’ भन्दै प्रतिप्रश्न गरेका हुन् ।
‘महालेखा परीक्षकको कार्यालयले समेत २२ अर्ब उठाउनुपर्ने भनेको छ, तर विद्युत प्राधिकरणलाई अघिल्लो सरकारले ६ अर्ब मात्रै उठाउन निर्देशन गरेको रहेछ, बाँकी १६ अर्ब कहाँ गयो ?’ माओवादी सांसद शक्ति बस्नेत लगायतलाई प्रधानमन्त्रीले प्रतिप्रश्न गरे ।
प्रधानमन्त्रीले उद्योगको लाइन काटेर बक्यौता उठाउने बाटो गलत भएको दोहोर्याउँदै उद्योग चलाएरै बक्यौता उठाइने पनि बताएका छन् । आफू सरकारमा हुँदा १६ अर्ब मिनाहा गरेर अहिले सरकारले महशुल मिनाहा गर्न लागेको भन्ने झुटो नगर्न समेत आग्रह गरे ।
