स्वतन्त्र उर्जा उत्पादक संघ इप्पानका अध्यक्ष गणेश कार्कीले जलविद्युत आयोजनाको विकासमा देखिएका तगाराहरु हटेमा निजी क्षेत्रले नै २८ हजार मेगावाटका आयोजना बनाउने बताएका छन् । भिजन लुम्बिनी उर्जा कम्पनी लिमिटेडले निर्माण गरेको २५ मेगावाटको सेती नदी जलविद्युत आयोजनाको औपचारिक उद्घाटन कार्यक्रममा उनले यस्तो बताएका हुन्।
अध्यक्ष कार्कीले सेती नदी आयोजना कै मोडलमा जनताबाट रकम उठाएर धेरै जलविद्युत आयोजना निर्माण गर्न सकिने बताए । तर त्यसको लागि अहिले देखिएका सबै तगाराहरु हट्नु पर्ने उनको भनाई थियो। ति तगाराहरु हटाउन आफुहरुले राजनीतिक पहल गरिरहेको, राजनीतिक नेतृत्वबाट प्रतिवद्दता पनि भएर तर तगाराहरु नहटेको उनले बताए। उनले सरकारले ऐन र कानुन बनाएर बाँकि विषय निजी क्षेत्रलाई छोडीदिएमा आफुहरुले सरकारले तोकेको लक्ष्य अनुसार नै आयोजना निर्माण गर्ने दाबी गरे।
उनले २३ महिनादेखि जलविद्युतको आईपीओ रोकिएको अशन्तुष्टी व्यक्त गरे। आईपीओ रोकिएको विषयमा प्रधानमन्त्रीदेखि सबै पार्टीका नेतृत्वहरुलाई ध्यानाकर्षण गराउंदा पनि आईपीओ नखुलेको गुनासो गरे।
त्यस्तै उनले संसदको लेखा समितिले जनताका दुख पनि हेर्नु पर्ने, व्यवसायीलाई पनि हेर्नु पर्ने र लगानीकर्ताको हित संरक्षण गर्नु पर्ने बताए। लेखा समितिको निर्देशनलाई सच्याउन पनि उनले आग्रह गरे। उनले अब बन्ने आयोजनाका कम्पनीमा आधारभूत शेयरधनी नै नहुन सक्ने भन्दै उनले संसदीय समितिहरुलाई साना साना आयोजनालाई कस्ने खालका निर्देशन नदिन पनि आग्रह गरे।
भिजन लुम्बिनी उर्जा कम्पनी लिमिटेडद्वारा प्रवर्द्धन गरिएको २५ मेगावाट क्षमताको सेती नदी जलविद्युत आयोजनाले गत कार्तिक २७ गतेदेखि व्यापारिक उत्पादन शुरु गरेको थियो। सो को औपचारिक उद्घाटन भने आज गरिएको हो।
