सरकारले सार्वजनिक यातायातको दर्ता रोकेपछि अटोमोबाइल्स व्यवसायी असन्तुष्ट बनेका छन् । अटोमोबाइल्स व्यवसायीको छाता संस्था नाडा अटोमोबाइल्स एशोसिएन अफ नेपालले दर्ता रोक्नुको स्पष्ट कारण खुलाउन माग गरेको छ ।
सरकारले सार्वजनिक यातायातको दर्ता रोक्न देशभरीका यातायात कार्यालय र प्रदेशस्थित कार्यालयहरुलाई निर्देशन दिएपछि बसेको नाडाको आकस्मिक बैठकल नयाँ सार्वजनिक सवारीको दर्ता प्रक्रिया रोक्ने निर्णय गरिनुको कारण खुलाउन माग गरेको हो ।
नाडाले बिना छलफल र पूर्व जानकारी सवारी दर्ता प्रक्रिया रोकिएको भन्दै यसको स्पष्ट कारण र उद्देश्य प्रष्ट पार्न सरकार समक्ष माग गरेको हो । नाडाका अध्यक्ष सुरेन्द्र कुमार उप्रेती (सुरेश)ले सार्वजनिक सवारी साधनको दर्ता रोक्ने निर्णयले व्यवसायीसहित सरकारकै राजस्वमा समेत गम्भीर असर पर्नेतर्फ ध्यान दिन सरकारलाई अनुरोध गरेका छन् । अनिश्चित कालका लागि दर्ता रोकिनु न्यायोचित नभएको भन्दै कति समयका लागि रोकिएको हो भन्ने सन्दर्भमा समेत प्रष्ट जानकारी नदिई गरिएको निर्णयले गम्भीर संकट निम्त्याउन सक्ने नाडाको चिन्ता छ ।
