मितेरी डेभलपमेन्ट बैंकले आफ्नो स्वामित्वमा रहेको नेपाल क्लियरिङ हाउस लिमिटेड (एनसीएचएल)को संस्थापक शेयर बिक्री गर्ने भएको छ । कम्पनीले आफ्नो स्वामित्वमा रहेको नेपाल क्लियरिङ हाउसको ३१ हजार ६ सय कित्ता संस्थापक शेयर लिलाम बढाबढ मार्फत बिक्री गर्ने भएको हो।
यस लिलामीको शेयर खरिदको लागि वाणिज्य बैंक, विकास बैंक र फाइनान्सले मात्र आवेदन दिन सक्ने छन् । आवेदन दिंदा पुरै ३१ हजार ६ सय कित्ताको लागि आवेदन दिनु पर्ने छ । असार २१ देखि असर २५ गतेसम्म आवेदन दिन सकिने छ ।
बैंकले यी शेयरको न्युनतम मूल्य प्रति कित्ता ५ सय रुपैयाँ कायम गरेको छ । सो भन्दा बढी मूल्य कबुल गरि शेयर खरिदको लागि आवेदन दिनु पर्ने छ। शेयर लिलाम प्रक्रियाको लागि प्रभु क्यापिटल बिक्री प्रबन्धक चयन गरेको छ ।
बैंकले यस अघि असार ६ गतेदेखि असार १२ गतेसम्म आवेदन दिन सकिने गरि ति शेयर लिलाममा ल्याएको थियो । त्यस समय ति शेयरको न्युनतम मूल्य प्रति कित्ता ७ सय तोकिएको थियो। अहिले बैंकले मूल्य घटाएर फेरी शेयर लिलाममा ल्याएको हो ।
