वाणिज्य बैंकको शाखा पुग्न बाँकि रहेको देशको एक मात्र स्थानीय तहमा आजबाट शाखा पुगेको छ । बझाङको साइपाल गाउँपालिकामा एभरेष्ट बैंक लिमिटेडले शाखा खोलेको हो ।
आज नेपाल राष्ट्र बैंकका गभर्नर महाप्रसाद अधिकारीले उक्त शाखाको उद्घाटन गरेका हुन् । उक्त शाखाको उद्घाटनसँगै ७५३ वटै स्थानीय तहमा वाणिज्य बैंकको वित्तीय सेवा विस्तार भएको छ ।
गभर्नर अधिकारी हेलिकप्टर चढेर सो शाखा उद्घाटन गर्न साइपाल पुगेका थिए । शाखा उद्घाटनमा एभरेष्ट बैंकका अध्यक्ष बालगोपाल बैद्य, तथा बैंकका प्रमुख कार्यकारी अधिकृत सुदेश खालिङ लगायतको टोली पुगेको थियो। गभर्नर सहितको टोलीलाई स्थानीयले बाजागाजा सहित स्वागत गरेका थिए।
भौगोलिक कठिनाइका कारण उक्त गाउँपालिकामा अहिलेसम्म बैंकको शाखा थिएन। बझाङको साइपाल गाउँपालिकामा वाणिज्य बैंकको शाखा स्थापनालाई अन्तिम रूप दिने सन्दर्भमा गत जेठमा राष्ट्र बैंकमा छलफल भएको थियो। छलफलमा गभर्नर अधिकारी, गाउँपालिकाका अध्यक्ष मानवीर बोहरा र एभरेष्ट बैंक लिमिटेडका प्रतिनिधि लगायत उपस्थित थिए । लामो समयको प्रयासपछि साइपालमा बैंकको शाखा पुगेको हो ।
