नेपाल वैदेशिक लगानी ल्याएका कम्पनीहरुले आर्थिक वर्ष २०७९/८० मा लाभांशको रुपमा १७ अर्ब बढी रकम आफ्नो देशमा फिर्ता लागेका छन् । उनीहरुले लाभांशको रुपमा कुल १७ अर्ब ३३ करोड ४७ लाख रुपैयाँ फिर्ता लगेका हुन् ।
नेपाल राष्ट्र बैंकको तथ्यांक अनुसार कुल १७ अर्ब ३३ करोड मध्ये ८ अर्ब ८४ करोड ७६ लाख रुपैयाँ लाभांश उत्पादन क्षेत्रको रहेको छ । त्यस्तै सूचना प्राविधि क्षेत्रबाट ३ अर्ब ६७ करोड ३५ लाख रुपैयाँ लाभांश बाहिरिएको छ भने बैंक तथा वीमा क्षेत्रबाट ३ अर्ब ५० करोड लाभांश नेपाल बाहिर गएको छ ।
अघिल्लो आर्थिक वर्षको तुलनामा नेपालबाट बाहिरिने लाभांश १०.५ प्रतिशतले बढेको छ। आर्थिक वर्ष २०७८/७९ मा नेपालमा लगानी गर्ने कम्पनीले १५ अर्ब ६७ करोड रुपैयाँ लाभांश बाहिर लगेका थिए ।
राष्ट्र बैंकको तथ्यांक अनुसार आर्थिक वर्ष २०७९/८० मा कुल ६ अर्ब रुपैयाँको वैदेशिक लगानी नेपाल भित्रिएको थियो। आर्थिक वर्ष २०७८/७९ मा १८ अर्ब ६ करोड वैदेशिक लगानी नेपाल आएको थियो ।
नेपालमा आउने वैदेशिक लगानीमा सबैभन्दा ठूलो हिस्सा भारत र चीनको रहेको छ । नेपाल आउने कुल वैदेशिक लगानीमा भारतको हिस्सा ३५ प्रतिशत छ भने चीनको हिस्सा १२ प्रतिशत छ ।
प्रादेशिक रुपमा हेर्दा नेपाल आउने वैदेशिक लगानी मध्ये बागमतीमा सबैभन्दा धेरै ५९.७ प्रतिशत आएको छ भने गण्डकीमा १५.१ प्रतिशत तथा कोशीमा १४.७ प्रतिशत आएको छ।
