नेपाल बैंकर्स संघका अध्यक्ष सन्तोष कोईरालाले गत वर्षको तुलनामा बैंकिङ उद्योग सुरक्षित रहेको बताएका छन् । आईतवार इकोनोमिक मिडिया सोसाइटी नेपालले आयोजना गरेको कार्यक्रममा उनले यस्तो बताएका हुन् ।
अध्यक्ष कोइरालाले बैंकिङ क्षेत्रमा कर्जा प्रवाहको वृद्धिदर ५ प्रतिशत देखिएको बताए । उनले अहिले बैंकहरुको सिडी रेसिया ७९ प्रतिशतमा रहेको जानकारी दिए ।
उनले समग्रमा हेर्दा बैकिङ उद्योग सुरक्षित रहेको देखिएको बताए । उनले बैंकिङ क्षेत्र सुरक्षित देखिए पनि बैंकहरुमा खराब कर्जा ४.५ प्रतिशत रहेको बताए । उनले केही बैंकहरुको ५ प्रतिशत भन्दा माथि पुगेपनि चिन्ता लिनुपर्ने अवस्था नभएको बताए । अध्यक्ष कोईरालाले निष्क्रिय कर्जा व्यवस्थापनको लागि बैंकहरुले सम्भावित कर्जा नोक्शानीबापत प्रोभिजन गर्ने क्षमता भएसम्म बैंकिङ उद्योग बलियो हुने बताए ।
उनले दक्षिण एशियाका मुलुकहरुसँगको तुलना गर्दा पनि नेपालको बैंकिङ क्षेत्रको अवस्था राम्रो रहेको बताए । उनले राष्ट्र बैंकले ल्याएको नीतिका कारण बैंकहरु सबल रुपमा रहेको धारणा राखे।
